Rêveberê Nexweşxaneya Emelê ya Kobanê Yaser Balî têkildarî îdiaya “Li nexweşxaneya Kobanê ji bo cenazayê zarokê 8 mehî bide malbatê 400 dolar xwestiye” derewand û diyar kir ku îdiayên derbarê nexweşxaneya wan de ne rast in.
Rêveberê Nexweşxaneya Emel a Kobanê Yaser Balî têkildarî îdiayên “Nexweşxane ji malbata ku xwestiye cenazeyê zaroka xwe ji nexweşxaneyê derxîne 400 dolar xwestiye” ji Kobanê FMê re axivî. Yaser Balî bi lêv kir ku îdiaya li ser medyaya sanal belav dibin û tê gotin ku nexweşxaneyê gotiye “Heta hûn perê neynin” derew e û wiha got: “Me tu car tiştek wisa li tu kesê nekiriye ku îro em welatiyên xwe yên li Kobanê bikin. Bi salan em emeliyatan belaş dikin. Malbatê piştî zarok anîn vir, bijîşkan rewşê nêrî û gotin ‘Ev zarok li vir nikarê were dermankirin, divê biçe Helebê’. Malbatê jî got em nikarin biçin Halebê. Bijîşkan ji malbatê re gotine ku ‘Heke li vir be heta çend rojan dê jiyana xwe ji dest bide’. Malbatê jî gotibû ’em qebûl dikin, lê em nikarin bibin Helebê’. Piştî zarok jiyana xwe ji dest da malbat çûbû muhasebeyê û pereyê xwe dabû. Hesabê wan 2 milyon û 300 hezar bû. Lê muhasebe 200 hezar negirtibû. Bêyî ku malbat bêje em nikarin. Piştre jî malbatê cenaze xwe biribû. Yanî tiştên tê gotin ne rast in.”
Derbarê bûyerê de
Li Kobaniyê ku 25 roj in di dorpeçê de ye zarokê bi navê Xelîl Mislim ê 8 mehî jiyana xwe ji dest dabû. Pîra zarok Xufre Mihemed ku tev li bultena Rûdaw TVyê bûbû îdia kiribû ku nexweşxaneya Emel ji bo cenazeyê neviyê wê radest bike, ji malbatê 400 dolar pere xwestiye. Malbatê li ser vê yekê pere deyn kiriye û bi wî awayî cenazeyê zarokê xwe wergirtiye.
‘Dorpêç didome, tengasî zêde ne’
Rêveberê Odeya Bijîşkan a Kobanê Dr. Nehsan Ehmed jî ji Stêrk TVyê re axivî û diyar kir ku heta van kêliyan jî dorpêç li ser Kobanê didome û got: “Ji ber dorpêçê em nikarin ji sedî sed pêdiviyên gel ên derman û tedawiyê pêk bînin. Divê beriya her tiştî ji her milî ve ji sedî sed dorpêç rabe. Xizmeta tenduristiyê ya li Kobanê ji sedî 90ê belaş e. Nexweşxaneyên li Kobanê di rewşên wiha awarte de li kêleka gel disekinin.”
