Stenbol – Dayikên Aştiyê yên Stenbolê bi rasthatina salvegera komploya li dijî Rêberê Gelê Kurd Abdullah Ocalan hatiye pêkanîn wiha gotin: “Serokê me hat girtin lê belê Serok bi têkoşîn û berxwedana xwe ve komployê vala derxist. Heta ku Serokê me azad be em ê li ber xwe bidin.”
Di 15ê Sibata 1999an de Rêberê Gelê Kurd Abdullah Ocalan bi kompleyekî navneteweyî hat girtin û radestî dewleta Tirkiyê hat kirin. 15ê Sibatê di nava gelê Kurd de wekî “Roşa Reş” hat pênasekirin. Endamên Înîsiyatîfa Meclisa Dayikên Aştiyê yê Stenbolê têkildarî salvegera 15ê Sibatê ji Ajansa Welat (AW) re axivîn.
‘Em ê li ber xwe bidin û bi ser kevin’
Dayika Aştiyê Rewşan Doner berî ku dest bi axaftina xwe bike komploya navneweyî ya 15ê Sibatê şermezar kir û wiha axivî: “Komplo berî çend salan dest pê kiribû jixwe. Ew çend sal bûn ku me ji welatê xwe koçî Stenbolê kiribû. Dema ku me bihîst Reberê Gelê Kurd hatiye girtin ez gelek xemgîn bûm. Ew çend raperînên gelê Kurd hatibû têkbirin. Komplogeran listîka xwe pêk anîn. Lê Serokatî bi gavên xwe ve komployê vala derxist. Gelê Kurd jî li her derê xwedî li Serokatî derket. Heta îro jî ev xwedîderketin berdewam dike. Em hêvîdarin ku mafê hêviyê pêk were û Serokatî azad bibe. Lê divê em ji bo azadiya Serokatî bixebitin û yekîtiya gelê Kurd ava bikin. Îro dîsa komploya duyemîn heye. Em jî dê li ber xwe bibin û bi ser kevin.”
‘Serokê gelê Kurd azad be dê tevahî gelê Kurd jî azad be’
Dayika Aştiyê Emîne Erbek jî destnîşan kir 15ê Sibatê êşeke mezin li wê daye kişandin û ev tişt gotîn: “Êşa 15ê Sibatê gelek giran bû. Gelê Kurd çend rojan li dijî komployê daket qadan. Tu kes li malên xwe neman. Bi 15ê Sibatê rojekî reş li ser gelê Kurd hate pêkanîn lê bi berxwedanê ronahî derket. Em ê bi vê ronahiyê bi ser kevin. Îro pêvajoyek, em dizanin ku Serokê Gelê Kurd azad be dê tevahiya Gelê Kurd jî azad be. Bi navê ‘aştiyê’ dixwazin gelê Kurd xapînin lê gelê Kurd nayê xapandin. Em bi xwe bawer in.”
‘Dewlet li gor pêvajoyê gav biavêje dê Serokê me azad bibe’
Dayika Aştiyê Guluş Yilmaz anî ziman ku dema wan 15ê Sibatê bihîstiye rabûne li ser pêyan û wiha got: “Em bi vê bûyera gelek xemgîn bûn û êşiyan. Ji ber aştî gelek girîng e. Em dixwazin tu kes jiyana xwe ji dest nede. Piştî Serokatî hat girtin, em çand rojan daketin li qadan. Jixwe îro jî pêvajo heye, em dîsa aştiyê dixwazin. Di vê pêvajoyê de Gelê Kurd gelek gavên girîng avêt. Em dixwazin dewlet jî li gorî pêvajoyê gavan biavêje û Serokê me azad be.”
‘Em ê di salvegera 27emîn a 15ê Sibatê de jî li qadan bin’
Dayika Aştiyê Ayten Toprak jî bi bîr xist ku girtina Serokatî ji bo wan rojeke giran bûye û ev tişt gotin: “Tevahî gelê Kurd daket qadan û li ber xwe da. Heta îro jî em li ber xwe didin. Heta ku Serokê me azad bibe em ê li ber xwe bidin. Em ê di salvegera 27emîn ya 15ê Sibatê de jî li qadan bin.”
