Li Semsûrê di salvegera 3an a erdhejên 6ê Sibatê de ber bi quleya seatê ya navenda Semsûrê ve meşa bi girseyî hat lidarxistin û ji bo bîrana kesên di erdhejê de jiyana xwe ji dest dane saet di 4.17an de qurnefîl danîn ber quleya seatê.
Platforma Ked û Demokrasiyê ya Semsûrê, tekildarî salvegera 3emîn a erdheja 6ê Sibatê meşa bi meşeleyan li dar xist. Hevseroka Giştî ya Partiya Herêmên Demokratîk (DBP) Çîgdem Kiliçgun Uçar, Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogullari, parlamenterên DEM Partiyê Ferît Şenyaşar û Alî Bozan, endamên partiyên siyasî, kesên di erdhejê de xizm û nasên xwe windakirine, saziyên sivîl û bi sedan kes tevlî meşe bûn.
Bi sedan kes li cihê nexweşxaneya kevn a navenda Semsûrê kom bûn û ji wir heta cihê quleya seatê ya navenda Semsûrê meşiyan. Girseyê di meşe de wêneyê kesên di erdhejê de jiyana xwe ji destdane û pankarta li ser, “Em di şînê de ne nadin jibîrkirin” rakirin. Girseyê di meşê de bi yek dengî dirûşmeyên, “Kes dengê min dibihîze”, “Em ji bîr nakin” “Em heqê xwe helal nakin” û “Em ji bîr kirin nakin, efû nakin” berz kirin.
‘Em ji bîr nakin û nadin jibîrkirin’
Meş bi danîna qurnefîlan li quleya seatê bi dawî bû. Piştî danîna qurnefîlan Hevseroka Giştî ya DEM Partî Tulay Hatîmogullari axivî. Tulay Hatîmogullari welatiyên di erdhejê de jiyana xwe ji dest dane bi bîr anî. û wiha axivî: “Em ji bîr nakin û nadin ji bîr kirin. Desthilat hîn jî ji karesatên mezin ku pêk bên, ders ne girtiye. Hê jî malbatên ku xizmên xwe di erdhejê de windakirine li benda edaletê ne. Em ê wan malbatan re di nava piştgiriyê de bin.”
Seat di 4.17an de firand hatin pêxistin û ji bo kesên di erdhejê de jiyana xwe ji dest dane deqîqeyeke rêz hat girtin. Ji bo kesên di erdhejê de jiyana xwe ji dest dane sela hat xwendin.
Çalakiyên bîranînê wê seat 10an de bi serdana goristanê berdewan bike.
