Saziya Mafên Mirovan HRANA ya Îranê bîlançoya 37 rojan a Îran û Rojhilatê Kurdistanê aşkera kir û ragihand ku di xwepêşandanan de 152 jê zarok, 6 hezar û 854 kes hatine qetilkirin.
Ajansa Mafên Mirovan HRANAê diyar kir ku bi qasî hatiye diyarkirin 6 hezar û 854 kes hatine kuştin û têkildarî 11 hezar û 280 bûyerên mirinê jî lêkolîn tê kirin. Hat ragihandin ku ji kesên hatin kuştin 152 ji wan zarok bûn û herî kêm 6 hezar û 430 kes ji aliyê hêzên rejîmê ve hatin kuştin.
Li gorî raporê, 11 hezar û 21 welatiyên sivîl birîndar bûne, 50 hezar 235 kes jî hatine binçavkirin yan jî îfadeya wan hatiye standin. Di nava van de 106 xwendekar hene. Her wiha hate diyarkirin ku dîmenên ‘’îtîrafa’’ bi darê zorê ya 303 kesan li ser medyaya dewletê hatine weşandin.
Ajansê da zanîn ku li gel zêdebûna zexta li ser xwepêşandanan daxuyaniyên şermezarkirina rejîmê yên ji aliyê rêxistinên civakî ve tên dayîn jî zêde bûne.
Bijîşkên çavan bal kişandin ser korbûna ji ber guleyan û rêxistinên mamosteyan jî kuştina xwepêşanderan û girtina wan şermezar kirin.
Di raporê de hate destnîşankirin ku kuştina zarok û ciwanan, windakirinên bi darê zorê û sepanên dermirovî yên li navendên binçavkirinê nîşaneyên krîza kûr a rêveberiya welêt e.
