Platforma Saziyên Demokratîk li dijî êrişên li ser Rojava li Geverê meşeke girseyî li dar xist û piştgiriya xwe ji bo Rojava anî ziman.
Li navçeya Geverê ya Colemêrgê bi pêşengiya Platforma Saziyên Demokratîk a Colemêrgê li dijî êrişên HTŞ, DAIŞ û çeteyên girêdayî Tirkiyeyê yên li ser Rojava meşek hate lidarxistin. Bi hezaran kes li ber avahiya DEM Partiyê ya Geverê kom bûn û bi dirûşmeya “Bijî berxwedana Rojava” ber bi Navenda Karsaziyê ya Zagrosê ve meşiyan. Di meşê de pankartên ku keziyên jinan û nivîsa “jin jiyan azadî” li ser bû û “Rojava xeta me ya sor e” hatin vekirin. Hevşaredarê Bajarê Mezin ê Wanê Abdullah Zeydan, parlementerên DEM Partiyê yên Colemêrgê, Dayikên Aştiyê, TJA û bi hezaran welatî tev li çalakiyê bûn.
‘Em hovitiyê qebûl nakin’
Parlementer Oznur Bartin li ber Navenda Karsaziyê ya Zagrosê axivî û bi bîr xist ku zarokên Kurd ji ber sermayê jiyana xwe ji dest dane û ev tişt anî ziman: “Em vê hovîtiya li dijî gelê Kurd tê kirin qebûl nakin, û em ê li her deverê li ber xwe bidin. Me ji ber gotina ’em aştiyê dixwazin’ bedelên giran da û gelek can winda kirin. Em ê li ser mîrat û têkoşîna kesên ku ji bo vê dozê jiyana xwe dane têkoşînê mezintir bikin. Hûn ji Kurdan çi dixwazin? Em tenê jiyanek aştî û wekhev dixwazin. Parastina Rojava tê wateya parastina mirovahiyê. Em ê şoreşa jinan a li Rojava biparêzin.”
‘Kurd dê lîstokên we têk bibe’
Piştre hevşaredar Abdullah Zeydan bal kişand ser têkoşîna Kurdan û wiha axivî: “Em ê tu carî destûrê nedin ku statuya Rojava were hilweşandin. Gelê Kurd û ciwanên Kurd li wir bedelên pir giran didin. Cenazeyên hevalên me yên jin ji avahiyan têne avêtin û porê wan tê birîn. Em ê li hember vê zilmê li ber xwe bidin. Me ev çete û her kesê ku piştgiriyê dide wan, tevî hêzên navneteweyî hişyar kiriye. Ev hesab xelet e; ev hesab dê ji Kobanê ji berxwedana gelê Kurd vegere. Ev hesabên xelet dê ji Amed, Hewler û Kerkukê vegere. Rêberê Gelê Kurd Birêz Abdullah Ocalan hişyarî da hemû welatên Rojhilata Navîn û got ku divê destê aştiyê were dirêjkirin. Îro, berxwedana gelê Kurd li qada navneteweyî tê bihîstin. Armanca me statuya Rojava ye. Gelê Kurd dê hemû lîstikên we têk bibe. Em ê heta dilopa xwîna xwe ya dawî ji bo Rojava têbikoşin. Em ê yekîtiya xwe misoger bikin. Em ê têkoşîna xwe bidomînin heta ku statuya Rojava were naskirin.”
Piştî axaftinan girse careke din bi dirûşman heta avahiya DEM Partiyê meşiya û çalakî bi dawî bû.
