Li gorî nûçeya rojnameya Wall Street Journal (WSJ), karsazê Amerîkî Tom Barrack bi sozên “garantiyê” Kurd îkna kirine ku hêzên xwe paş de bikişînin, lê ev yek rê li ber êrîşên komên çekdar vekiriye. Di dema ku Kurd li benda lihevkirineke ewle bûn, bi xefikeke diplomatîk re rû bi rû man.
Di nûçeyê de tê diyarkirin ku navê Tom Barrack di lîstikeke qirêj a diplomatîk de derdikeve pêş. Hat îddiakirin ku Barrack bi nûnerên Kurd re hevdîtin pêk aniye û ji wan xwestiye ku wekî “nîşaneya niyeta baş” hêzên xwe ji Helebê vekişînin û berê xwe bidin rojhilatê Firatê. Barrack di van hevdîtinan de soz daye ku Amerîka dê di muzakereyan de piştgiriya Kurdan bike.
Valahî û êrîşên berfireh
Lê belê, piştî ku Hêzên Sûriya Demokratîk (HSD) bi baweriya vê lihevkirinê dest bi vekişînê kir, komên wekî HTŞ, DAIŞ û çeteyên girêdayî Tirkiyeyê ev valahî wekî firsend dîtin û bi lez êrîş birin ser herêmên Kurdan.
Dema ku Kurd li benda parastina herêmê bi rêyên diplomatîk bûn, rastî êrîşeke berfireh man. Di heman demê de, eşîretên ereb ên ku berê bi HSD’ê re tevdigeriyan, alî guherandin û piştgirî dan komên çeteyan. Hat ragihandin ku hinek rayedarên payebilind ên Amerîkî jî ji vê rewşê û polîtîkayên bi vî rengî pir aciz bûne.
