Rêvebirê SESa Îzmîrê Mahfuz Karaaslan destnîşan kir ku divê Deriyê Sînorê Murşîtpinarê yê li Kobanê bi lezgînî bê vekirin. Karaaslan da zanîn ku wan ji bo şandina alîkariya tibî serî li Wezareta Tenduristiyê ya Tirkiyê daye.
HTŞ û komên paramîlîter ên ku Tirkiye piştgiriyê dide wan, ev çend roj in Kobanê dorpêç kirine. Li Kobanê ya ku elektrîk û av li serê hatiye birîn, heta niha ji ber sermayê 5 zarokan canê xwe ji dest dane. Di vê çarçoveyê de ji bo peydakirina pêdiviyên bingehîn, bangên vekirina Deriyê Sînor ê Murşîtpinarê tê kirin.
Ji bo gihandina xizmetên tenduristiyê ya ber bi Kobanê ve, hewldan û bangek jî ji aliyê Sendîkaya Kedkarên Tenduristî û Xizmetên Civakî (SES) a Şaxa Îzmîrê hat. Di vê çarçoveyê de rêvebirê SESa Îzmîrê Mahfuz Karaaslan têkildarî mijarê ji ajansa me re axivî.
Mahfuz Karaslan diyar kir ku her çend agahiyên zelal ji Kobanê neyên jî, nebûna koridoreke alîkariyê bi serê xwe krîzeke mezin e û got: “Divê em ji bîr nekin; tenduristî û azadî bi hev re têne pênasekirin. Sedema serlêdana me ya li Wezareta Tenduristiyê ew e ku em nikarin li hemberî mirina zarokên ku ji ber nebûna pêdiviyên mirovî jiyana xwe ji dest didin, bêdeng bimînin.”
‘Pîvana me peymana Cenevreyê ye’
Mahfuz Karaaslan bi bîr xist ku di her şert û mercî de divê xizmetên tenduristiyê berdewam bikin û wiha dewam kir: “Di vê mijarê de bingeha me Peymana Cenevreyê ye û divê her kes li gorî peymanê tevbigere. Ger deriyê sînor bê vekirin, kedkarên tenduristiyê ji bo destwerdana lezgîn û xizmetên civakî amade ne. Ev ne tenê xwestekek, erka etîka pîşeya me ye.”
‘Tenduristkar alîgirê jiyan û aştiyê ne’
Mahfuz Karaaslan destnîşan kir ku li çar aliyên cîhanê di dema şeran de ji bo xizmetên tenduristiyê navber hatine dayîn û bijîşkan bi mîsyonên xwe rê li ber aştiyê vekirine û got: “Tenduristkar di her şertî de ji bo jiyanê dixebitin. Divê hemû nexweşên kronîk û pêdiviyên ku dibin sedema nexweşiyan bên dabînkirin. Tenduristkarî vê yekê li me ferz dike.”
