Platforma Ked, Aştî û Demokrasiyê ya Stenbolê di daxuyaniya ji bo Rojava de diyar kir ku berxwedana jinan û berxwedana azadiyê di bin dorpeçê de ye û got: “Em bang rêxistinên kedê yên navneteweyî dikin ku li dijî êrişên li ser Rojava rabin.”
Platforma Ked, Aştî û Demokrasiyê ya Stenbolê li dijî êrişên li ser Rojava bi şîara “Li Rojhilata Navîn ji tarîtiya emperyalîzmê û tarîtiya HTŞê re na” daxuyanî da. Di daxuyaniyê de dirûşmeya “Bijî berxwedana Rojava” hat berzkirin. Nûner û rêveberên partiyên siyasî, endamên saziyên civakî û gelek kes tev li daxuyaniyê bû.
‘Gelên herêmê bi giştî di bin gefa komkujiyê de ne’
Daxuyanî ji aliyê endamê KESKê Huseyîn Ozev ve hat xwendin. Huseyîn Ozev anî ziman ku li Bakur û Rojhilatê Sûriyeyê bi hezaran sivîl di bin dorpeçê de ye û wiha axivî: “Biryara agirbestê heye lê êrişên HTŞê didomin û ev êrişên HTŞê sûcên şer in. Ji ber ku bajar tên dorpeçkirin gel bêav û bênan maye. Gelên herêmê bi giştî di bin gefa komkujiyê de ne. Di bin dorpeça HTŞê de heta niha herî kêm 6 zarok jiyana xwe ji dest dane. Hê jî bi hezaran zarok di bin dorpeçê de ne. Gel nikare xwe bigihijîne xizmetên tenduristiyê. Di di xala yekemîn a peymana Mafên Zarokan a Neteweyên Yekbûyî de tê gotin ku ‘Mafê jiyanê ya her zarokî heye.’ Mafê jiyana ya gelekî bi sistematîk ber bi tunebûne ve birin sûcek navneteweyî ye.”
‘Li dijî êrişên li ser Rojava rabin’
Huseyîn Ozev destnîşan kir ku ew bang Neteweyên Yekbûyî dikin ku divê demildest dorpeça li ser Rojava bê rakirin û got: “Divê êrişên li ser cihên av, nan û dermanxaneyan bê rawestandin. Korîdora mirovî bê vekirin. Li Rojava ne tenê sivîl di bin dorpeçê de ye, berxwedana jinan û berxwedana azadiyê di bin dorpeçê de ye. Ji 6ê çileyê ji vir ve ji ber çavgirtin û alikariya hêzên emperyalistan di girtîgehan de hezaran DAIŞî hatin berdan. Em bang rêxistinên kedê yên navneteweyî dikin ku li dijî êrişên li ser Rojava rabin û ji bo astengiyên li pêşiya alikariyan bê rakirin çalakiyan li dar bixin.”
Daxuyanî bi berzkirina dirûşmeyan bi dawî bû.
