Hevserokê Giştî yê DEM Partiyê Tuncer Bakirhan nerazîbûn nîşanî desteserkirina Hevşaredarên Akdenîzê da û got: “Ev rê ne ti rê ye. Em bang li desthilatdariyê dikin ku dest ji polîtîkaya qeyûm berde.”
Hevserokê Giştî yê DEM Partiyê Tuncer Bakirhan û şandeya pê re bi minasebeta 10ê Çile Roja Rojnamevanên Dixebitin serdana ofîsa Ajansa Mezopotamya, JINNEWS û Rojnameya Yenî Yaşamê ya Enqereyê kir. Rojnamevan-nivîskar Huseyîn Aykol, xebatkarên ajansan û rojnameyê pêşwaziya serdanê kirin. Tuncer Bakirhan destegulek diyarî Huseyîn Aykol kir û vê rojê li rojnamevanan pîroz kir.
Tuncer Bakirhan piştî serdanê pirsên rojnamegeran bersivand. Bakirhan bal kişand ser desteserkirina Hevşaredarên Akdenîz a Mersînê û wiha got: “Me gelek caran vegot û ispat kir. Ev rê ne ti rê ye. Ev yek, van meseleyan çareser nake. Xespkirina îradeya gel, kompasa li ber îradeya gel, ne tu rê ye. Bêhurmetiyeke mezin a li dijî vîna gel e. Em bang li desthilatdariyê dikin ku dev ji van polîtîkayên qeyûm berde. Em wan vedixwînin cidiyetê. Li rexekî wê nîqaşên pêvajoyê bên kirin û li rexa din jî operasyon tên kirin. Em serî li ber van sepanan natewînin. We gelek caran ceriband lê we tu encam bi dest nexistin.”
Tuncer Bakirhan da zanîn ku Hevseroka Giştî ya DEM Partiyê Tulay Hatîmogûllari wê biçe Mersînê û got: “Em ê pêvajoyê ji nêz ve bişopînin.”
‘Qefleya Îmraliyê vekin’
Tuncer Bakirhan têkildarî nîqaşên piştî hevdîtina bi Rêberê PKKê Abdullah Ocalan re tên kirin jî ev tişt anî ziman: “Heke ev nîqaş bi rastî jî derbasî pêvajoyekê bibin, wê demê divê zemîna ku birêz Ocalan bikaribe bi rola xwe rabe. Divê zemîna vê yekê bê amadekirin û qefleya Îmraliyê bê vekirin. Em nizanin dê çi bi van hevdîtinan bibe û wê veguherin tiştekî çawa. Şandeya me ji me re got ku rojeveke weke efûya giştî tune ye.”
