Xelkê Kobanê cenazeyê 16 şervanan ku li Girtîgeha Eqtanê ya Reqayê jiyana xwe ji dest dabûn li Pakrewangeha Şehîd Dicle ya Kobanê spartin axê.
Di êrişên çeteyan ên li dijî Girtîgeha Eqtanê ya Reqayê de 16 şervanên HSDê jiyana xwe ji dabûn. Xelkê bajarê Kobanê îro ji bo cangoriyên xwe merasîma cenaze li dar xistin. Xelkê Kobanê berê xwe da Pakrewangeha Şehîd Dîcle, cenazeyan spart axê.
Navên şervanên jiyana xwe ji dest dane wiha ne: Birûs Heleb, Akif Kobanê, Andok Elî, Celal Hemî, Ezgîn Kobanê, Roşan Zana, Çiya Jîn, Mûrad Xelîl, Viyan Efrîn, Mistefa Kino, Zagros Kawa, Harûn, Qedefî Hisên, Hesen Mele Hesen, Karker, Aram Hilko.
Merasîmê bi deqeyek rêzgirtinê dest pê kir. Dûre Hevserokê Desteya Jîngehê ya Kantona Firatê Arif Balî axivî. Balî got: “Bi berxwedanê em ê bighêjin serkeftinê. Ev şervan ji bo vî welatî û parastina rûmetê şehîd bûn. Em di pêvajoyek nû de jiyan dikin. Êrişên li ser herêmê berdewama komploya 1999an e. Ew ê nikaribin me qir û tine bikin. Em civaka şehîdan in û bi nirxên wan jiyan dikin. Misoger em ê li ber xwe bidin û bi ser bikevin.”
Paşê jî Hevseroka Meclîsa Malbatên Şehîdan a Kantona Firatê Sara Xelîl axivî. Sara Xelîl anî ziman ku çawa wan di van rojan de di sala 2015an de Kobanê ji DAIŞê rizgar kir, dê ew ê dîsa jî rizgar bikin.
Li ser navê malbatan Mistefa Kino, Leyla Berazî axivî. Leyla Berazî diyar kir ku berxwedana ku van hevalên di zindanê de kirin, berxwedaneke dîrokî bû.
Di dawiyê de cangorî bi tilîlî û dirûşmên “Şehîd namirin” hatin oxirkirin.
