Kurdên Erzirom û Bazîdê li dijî êrişên li ser Rojava derketin qadan û peyama piştgiriyê dan.
Li Erzirom û navçeya Bazîdê ya Agiriyê têkildarî êrişên çeteyên HTŞ û SMOyê yên li ser Rojava daxuyanî hatin dayîn û meş hatin lidarxistin. Welatiyên her du bajaran bi dirûşman bertekên xwe yên li dijî êrişan anîn ziman û peyama piştgiriyê dan.
Li navçeya Bazîd a Agiriyê, polîsan rê li ber girseya ku ji bo protestokirina êrîşên li ser Rojava meşiya, girt. Piştî astengkirina meşê, girse kom bû û bi dirûşmeyan nerazîbûn nîşan da. Parlamenterê DEM Partiyê Heval Bozdag li cihê kombûnê daxuyaniyek da. Heval Bozdag diyar kir ku êrişên li ser Rojava ne tenê gelê Kurd, lê di heman demê de pêşeroja hemû gelên herêmê jî hedef digire û got ku ev êriş ji hêla polîtîkayên hêzên navneteweyî û dewletên herêmî ve kûrtir dibin. Bozdag bi bîr xist ku gelê Rojava bi salan li dijî DAIŞê ji bo mirovahiyê bedelên giran daye û got: “Îro li Rojava tiştê ku tê hedefgirtin îradeya hevpar û wekhev a gelan e. Armanca van êrîşan tunekirina destkeftiyên gel e.”
Daxuyanî bi dirûşma “Bijî berxwedana Rojava” bi dawî bû.
Erzirom
Platforma Saziyên Demokratîk a Erziromê li dijî êrişên li ser Rojava li Erziromê meşek li dar xist. Beriya meşê, polîsan Navenda DEM Partiyê ya Erziromê ya li Mahallebaşiyê bi barîkatan dorpêç kir. Tevî astengiyan jî, girse meşiya. Di meşê de girseyê dirûşmeyên “Bijî berxwedana Rojava” û “Jin, jiyan, azadî” berz kirin û heta Meydana Bajêr meşiyan. Di meşê de, pankartên bi Tirkî û Kurdî yên bi nivîsa “Rojava wijdan e, azadî ye, berxwedan nayê teslîm girtin” hat vekirin. Piştî meşê daxuyaniyek hat dayîn.
‘Kurdan tu carî serî netewandiye’
Hevberdevka HDKê Meral Daniş Beştaş di civînê de axivî û diyar kir ku Kurd bi hestên hevpar li dijî êrişên li ser Rojava rabûn ser piyan. Meral Daniş Beştaş wiha berdewam kir: “Kî dikare li vir rehet be dema ku xwişk û birayên me di xetereya komkujiyê de bin? Ez li gelek bajarên Tirkiyeyê geriya me. Dilê her kesî li heman cihî lêdide, bi taybetî li Stenbol û Îzmîrê. Ger yekîtiyek rêxistinî ya wisa hebe ne hewce ye ku meriv siyasetê bike. Kurd îro nikarin bi aramî li malên xwe razên, nikarin serê xwe deynin ser balîfên xwe. Heke me dest ji têkoşînê berdaba, em îro li vir nedibûn. Gelê Kurd tu carî serî li ber tu kesî netewandiye û natewîne jî. Gelê Kurd niha li Rojava di bin xetereya komkujiyê de ye û em ê li dijî vê yekê dengê xwe bilindtir bikin.”
Daxuyanî bi çepik û dirûşmeyan bi dawî bû.
