Şandeya malbata rojnameger Cîhan Bîlgîn û Nazim Daştan jî di nav de piştî rawestandina 3 rojan, li sînor daxuyaniyek dan û diyar kirin ku ew ji deriye sînor derdikevin. Parlamenterê DEM Partiyê Kamuran Tanhan anî ziman ku ew ê li dijî vê biryara bêhiquqî sibê li navçeya Silopiyayê daxuyaniyeke girseyî bidin.
Şandeya ku ji malbatên rojnameger Cîhan Bîlgîn û Nazim Daştan, Parlamenterê Partiya Wekhevî û Demokrasiyê ya Gelan (DEM Parti) yê Mêrdînê Kamûran Tanhan endamên OHD, MEBYA-DERê û DFG pêk tê ji bo cenazeyê rojnamevan Nazim Daştan û Cîhan Bîlgîn werbigirin, roja 6ê çile saet 16.00an de çûn Deriyê Sînor ê Xêbûrê (Xelîl Îbrahîm). Şande 3 rojan li ser sînor bi hincetên cûda cûda li deriyê Xabûrê hatin rawestandin û nehiştin malbat biçin cenazeyên zarokên xwe bigirin.
Şandê di roja 3an de ji deriyê sînorê Xabûrê vêqetiyan. Şandê beriya ji deriyê sînor derbikevin daxuyaniyek dan û destnîşan kirin ku dê li dijî vê neheqiyê sibê li navçeya Silopiyayê daxuyaniyekê bidin.
‘Em 3 rojan li dijî hiqûqê dan sekinandin’
Di daxuyaniyê de Parlamenterê DEM Partî yê Mêrdînê Kamûran Tanhan axivî. Kamûran Tanhan anî ziman ku şandeya wan bi awayekî dijhiqûqî li deriyê sînor hatine sekinandin û ev tişt got: “Ew 3 roj in em li deriyê sînor tên sekinandin. Em bi sepaneke ku hemû nirxên mirovahiyê binpê kirin re rû bi rû man. 3 roj in me li vir û partiya me jî li meclise hevdîtin kirin. Lê hemû hewldanên me bê encam man. Me muxatabek nedît. Beriya ku em bêne vir me wezareta karê navxweyî û wezareta karen derve re hevdîtin kirin. Ji me re gotin tu pirsgirêk tune ye. Lê tevî vê yekê jî em 3 rojan bi awayekî dijhiqûqî dan sekinandin.”
‘Em ê têkoşîna xwe bidomînin’
Kamûran Tanhan diyar kir ku ew ji deriyê sînor derdikevin û wê têkoşîna wergirtina cenazeyan ji aliyê hiqûqî ve bidomînin. Kamûran Tanhan wiha axivî: “Em ê sibê nîvro li navçeya Silopiyayê daxuyaniyê bidin. Em bang li hemû gelê xwe dikin ku li dijî vê bêhiquqiyê bertekên xwe bi çalakî û daxuyaniyan bidominin. Cenaze 20 rojin li morgê tên sekinandin. Tu hewldanên dîplomasiyê encam negirtin. Ji bo eziyet nedin cenazeyan û ji malbatan îşkence nekin em îro ji deriye sînor derdikevin. Em ê vê biryara li dijî hiqûqî li hemû qadan bi gelê xwe re protesto bikin. Ew têkoşîna hiqûq û mafê ye. Ji bo dewlet vegere ser hiqûqê em ê bi malbatan re têkoşîna xwe bidomînin. Heta em cenazeyan bigirin em ê têkoşîna hiqûqî bidomînin. Em li vir vê sozê didin gelê xwe. Tu gumana me tuneye. Bi vê biryarê hiqûqa Tirkiyeyê ku qesî derziyekê mabû jî ji holê hat rakirin.”
‘Wezareta derva û hundir soza xwe pêk neaîn’
Bavê Nazim Daştan Mehmet Alî Daştan jî destnîşan kir ku wezareta Tirkiyeyê ya hundir û derve gotiyê hûn dikarin cenazeyên xwe bînin û wiha bertek nîşanî sekinandina wan da: “Em 3 roj in li vir tên sekinandin. Zarokên me rojnameger bûn. Sivîl bûn. Li ser karê xwe hatin qetilkirin. Em vê qetilkirinê qebûl nakin. 3 rojan em li ser sînor dan sekinandin. Nehiştin em biçin cenazeyên zarokên xwe bigirin. Ji me re dibêjinê “Sistem tune ye”. Bi vê yekê me dixapînin. Wezaretê derva û yê hundir soz dabûn me ku astengî dernaxînin. Bila soza xwe bi cih bînin. Wezaretê Dadê ji komisyona partiyan re gotin ew welatiyên me ne. Biçin cenazeyên xwe bînin. Em jî li ser gotinên wan hatin li vir ku biçin cenazeyên xwe bînin. Lê li vir em dan sekinandin. Nazim Daştan û Cîhan Bîlgîn rojnameger in. Li ser karê xwe hatin qetilkirin.”
Şande piştî daxuyaniyê vegeriya Sîlopiyayê.
