Însîyatîfa Jinan a Pêwîstiya Min bi Aştiyê Heye li pêşiya Balyozxaneya Sûriyeyê daxuyanî da û diyar kir ku ew tiştên ku li Rojavayê pêk tên qebûl nakin û bêdeng namînin.
Li stenbolê Însiyatîfa Jinan a Pêwîstiya Min bi Aştiyê Heye li pêşiya Balyozxaneya Sûriyeyê bi şiyara “Em li gel jinên berxweder ên Kurd in” daxuyanî da. Rêveberên DEM Partiyê yên Stenbolê, aktîvîsta TJAyê Sebahat Tuncel û gelek jin tev li daxuyaniyê bûn. Daxuyanî ji aliyê endama însiyatîfê Semîha Ari ve hate xwendin.
‘Em bêdeng namînin’
Semîha Ari diyar kir ku HTŞ bi destûra Tirkiye û emperyalîstan êrişî Rojava dike û wiha axivî: “Bi wan êrişan tê xwestin ku demografiya herêmê bê guherandin. Lê şeniyên wan herêman biryara berxwedanê da. HTŞê li dijî wan berxwedanan bersiva kuştinê da. Gelek îşkence pêk hat û wan îşkenceyan bi rêya medyayê parve kir. Bi taybetî jî dîmenên îşkenceya bedena jinan hate parvekirin. Bi vê hat xwestin vîna jinan bişkinîn. Îro Ewropa wekî ‘dergûşa mafê jinan’ tê penasekirin. Lê em dibînin ku li dijî êrişan bêdeng in. Ev bêdengî rewatiyê dide HTŞê. Em tiştên ku li Rojava pêk tên qebûl nakin û bêdeng namînin.”
Daxuyanî bi berzkirina dirûşmeyan bi dawî bû.
