Li gel DBPê û DEM Partiyê 13 partiyên siyasî û saziyên civakî li dijî êrişên bi piştiriya AKP û MHPê yên çeteyên HTŞê, daxuyanî dan û gotin: “Armanc destkeftiyên demokratîk ên gelê Kurd û statuya Kurdan e.”
DBP, DEM Parti, Partiya Şoreşger, EHP, EMEP, ESP, Halkevlerî, SMF, SODAP, SYKP, TÎP, TOP û Partiya Çepên Kesk, li dijî êrişên çeteyên HTŞê ku Tirkiye jî piştgiriya wan dike, daxuyanî dan.
Di daxuyaniyê de hat gotin ku bi destê çeteyên HTŞê re ji welatiyên herêmê re bi pevçûn û şer tê ferzkirin û wiha hat gotin: “Bi qasî ku HTŞ û çeteyên wê hatiye ser rêveberiyê li dijî gel û baweriyan şer daye îlankirin û dixwaze modela rengîn û azad ji holê rake.”
‘Parastina Kurdan parastina maf û rûmetê ye’
Di daxuyaniyê de hat gotin ku desthilata AKP û MHPê her carê piştevaniî daye êrişên çeteyan û wiha hat gotin: “Em li gel gelê Kurd ê bi komkujiyê re rû bi rû maye ne. Em ê li dijî van êrişan bêdeng nemînin, paş ve gavê neavêjin. Parastina destkeftiyên Kurdan parastina maf û rûmeta tevaiya gelên li herêmê ye.
Banga gelên cîhanê
Di daxuyaniyê de bang li hêz, rêxistin û şoreşgerên li Tirkiyeyê hat kirin ku ji bo xwişk-biratiya gelan werin cem hev û ev tişt hatin gotin:“Em banga piştevaniyê li gelên Rojhilata Navîn û cîhanê dikin ku bila aştiyê, wekheviyê û azadiyê biparêzin. Tu hêz nikarin li dijî vîna gelan a rêxistinkirî bisekine. Dê tu zordarî û polîtîkayên şer bi ser nekevin.”
