Navçeyên DEM Partiyê yên li Stenbolê li dijî êrişên li ser rojavayê Kurdistanê daxuyanî dan û hate diyarkirin ku ew ê bi berxwedana Kobaniyê destkeftiyên Rojava biparêzin. Piştî daxuyaniyê polîsan êrişî girseyê kir û gelek kes bi lêdanê hatin binçavkirin.
Çeteyên HTŞ û SMOyê di 6ê Çileyê ve êrişî taxên Kurdan Şêxmeqsûd û Eşrefiyeyê ên Helebê kirin. Di van taxan de berxwedanekê dîrokî hate nivîsandin. Paşê jî çeteyan êrişî heremên Bakur û Rojhilatê Sûriyeyê kirin. Li dijî êrişên çeteyên HTŞ û SMOye yê gelek cihên cûda çalakî tên lidarxistin. Rêxistinên Partiya Demokrasî û Wekheviyê ya Gelan (DEM Partî) yên Stenbolê jî li dijî êrişan li navçeya Sancaktepeyê daxuyanî dan.
Parlamentera DEM Partiyê ya Stenbolê Ozgul Sakî, Hevserokên DEM Partiyê yê Stenbol û navçeyan û gelek kes tev li daxuyaniyê bûn. Polîsan xwest daxuyaniyê asteng bike û girse dorpeç kir lê girse li ber xwe da û daxuyanî hate dayîn.
Girse dirûşmeyên “Bijî berxwedana Rojava”, “Rojava Rojhilat e Kurdistan yek welat e” hatin berzkirin. Daxuniyê ji hêla rêveberê DEM Partiyê yê Sancaktepeyê Omer Şen ve hat xwendin.
‘Êriş pêşiya DAIŞê vedike’
Omer Şen diyar kir ku çeteyên HTŞê di demekê watedar de êrişî taxşên Şêxmeqsûd û Eşrefiyê kirin û ev tişt anî ziman: “Di êrişan de tevahî cihan bêdeng ma. Ev êriş lji bo sabotekirina çareseriyê pêk hat. Êrişên ku gelê Kurd dike hedef ne tenê îro Suriyeyê pêşeroja Suriyeyê jî dixe di bin xetereyê. Ev êrîş di heman demê de dê bandoreke neyînî li pêvajoya ‘Aştî û Civaka Demokratîk’ bike. Kesên ku li dijî çareseriyê ne dixwazin pêvajoyê fetisînin. Êrişên ku li ser gelê Kurd berdewama êrişên gelên Elewî û Durziyan in. Ev êriş pêşiya DAIŞê vedike. Hezên Süriya Demokratîk temînata jiyaneke hevpar e. Kesên ku vê tiştê dizanin dixwazin vê temînatê tune bikin.”
‘Gelê Kurd li dijî wan êrişan ne bêalternatîf e’
Omer Şen destnîşan kir ku têkiliya Tirkiye û HTŞê van êrişan de jî bandor dike û wiha axivî: “Ev têkiliya HTŞ û Tirkiyeyê tu pêşerojekê baş misoger nake. Di heman demê de jî hêviya ku jiyanekê hevpar jî dê tune bike. Xwedîderketina Rojava xwedîderketina mirovahiyê ye. Gelê Kurd li dijî wan êrişan ne bêalternatîf e. Em ê bi berxwedana Kobanê destketiyên Rojava biparêzin. Em li gel Rêveberiya Xweseriyê ne. Tu hêz nekare gelê me tune bike. Em bang tevahî hêzen navneteweyî dikin ku gelê Kurd biparêzin.”
‘Em ê bi ser bikevin’
Paşê Parlamentera Stembolê Ozgul Sakî axivî û diyar kir ku îro carekî din êriş li ser Rojava tê kirin û got: “Belê Rojava di bin xetereyê de ye lê em dizanin Rojava ne tenê ye. Jiyaneke hevpar di bin xetereyê de ye. Ji bona wê divê em xwedî li Rojava derkevin. Em ê bi ser bikevin.
Piştî daxuyaniyê polisan êrişî girseyê kir û gelek kesî bi lêdanê binçav kir.
