Dadgeha Îdarî ya Herêmî ya Erziromê, biryara qeyim a Mîksê betal kir û da zanîn ku biryara qeyim li dijî qanûna şaredariyan û Destûra Bingehîn e.
Wezareta Karûbarên Navxweyî ya Tirkiyeyê, di 29ê mijdara 2024an de dozên li ser hevşaredarê navçeya Mîksê ya Wanê Ayvaz Hazir kirin hincet û qeyim tayînî Şaredariya Mîksê kir. Li dijî vê yekê hevşaredar Hazir serî li dadgehê da û doz vekir, lê Dadgeha Îdarî ya 5emîn a Wanê doz redkir. Dadgeha Îdarî ya Herêmî ya Erziromê, biryara betalkirina dozê ya Dadgeha Îdarî ya 5emîn a Wanê û doza Wezareta Karûbarên Navxweyî betal kir.
‘Belgeyên berbiçav nehatine pêşkêşkirin’
Dadgeha Îdarî ya Herêmî ya Erziromê ku doza hevşaredar Hazir nirxand, destnîşan kir ku ji bo ji kar dûrxistinek were sepandin, divê kiryarên îdiakirî rasterast bi erkên şaredar ve girêdayî bin. Biryarê tekez kir ku di dosyayê de ti agahî an belgeyên berbiçav nehatine pêşkêşkirin da ku piştgirî bidin îdiaya ku tohmetên li dijî şaredar di çarçoveya erkên wî de hatine kirin. Dadgehê diyar kir, “Ji bo ku rayedarên hilbijartî yên rêveberiyên herêmî ji kar werin dûrxistin, divê lêpirsîn an dozgerî li dijî wan ji ber sûcek têkildarî erkên wan hatibe destpêkirin.”
Her wiha, dadgehê ferman da Wezaretê ku bi qasî 7 hezar TL ji bo lêçûnên dadgehê û 30 hezar TL jî ji bo lêçûnên parêzeriyê bide hevşaredar.
Biryar bi piraniya dengan hat dayîn û ji bo Wezareta Karên Hundirîn jî rêya Daniştayê vekirî hişt.
