Meclisa Dayikên Aştiyê ya Îzmîrê ji bo êrişên ser Şêxmeqsûd û Eşrefiyê protesto bikin ber bi Enqereyê ve bi rê ketin.
Meclisa Dayikên Aştiyê ya Îzmîrê li dijî êrîşên li ser taxên Şêxmeqsûd û Eşrefiye yên Helebê li rêxistina DEM Partî ya Bayrakliyê daxuyanî dan û ber bi Enqereyê ve bi rê ketin. Di daxuyaniyê de dirûşmeyên “Bijî berxwedana Rojava”, “Kurdistan wê ji faşîstan re bibe goristan”, “Bijî Serok Apo” hatin berzkirin. Tevî nûnerên saziyên sivîl, gelek kes tevlî daxuyaniyê û oxirkirina dayikan bûn. Daxuyanî ji aliyê endamên Dayikên Aştiyê ya Îzmîrê Behiye Yalçin û Peyruze Kurt ve hat xwendin.
‘Wê Kurd li her derê piştgirê hev bin’
Dayika Aştiyê Behiye Yalçin bal kişand şerê li ser Helebê û got: “Jin û ciwan têne qetilkirin, em dixwazin ev qetlîam bêne sekinandin. Qene ev qetlîam bêne sekinandin, di vê sir û seqema zivistanê em ji Tirkiyeyê û ji bakurê Kurdistanê wekî Dayikên Aştiyê berê xwe didin Enqereyê. Bila dijmin baş bizanibin gelê kurd wê li her derê piştgirê hev bin û bi hev re tevbigerin.”
‘Bila Tirkiye aqilane tevbigere û destê aştiyê dirêj bike’
Paşê Peyruze Kurt axîvî û got: “Wê Sûriye û Rojava bi rihê Kobanê bigihîje serkeftinê. Em ê heta hetayê piştgirê wan bin û bila Tirkiye jî aqilane tevbigere û destê aştiyê dirêjî me bike. Li vir em qala aştiyê bikin û li wir şer hebe, ev nabe aştî û ti carî em aştiyeke wisa qebûl nakin.”
