Şirnex – Platforma Saziyên Demokratîk a Şirnexê têkildarî êrişên li dijî taxên Şexmeqsûd, Eşrefiye û Benî Zêdê daxuyaniyek da. Newroz Ûysal a di daxuyaniyê de axivî destnîşan kir ku tişta li taxên Helebê tê kirin sûcê mirovahiyê ye û got: “Em dizanin tiliya dewleta Tirk di van êrîşan de heye. Li Helebê êriş, li bakurê Kurdistanê aştî nabe.”
Bi pêşengiya Platforma Saziyên Demokratîk a Şirnexê têkildarî êrîşên li ser taxên Şêx Mexsûd, Eşrefiye û Benî Zêdê yên Helebê li ber avahiya DEM Partiyê ya Cizîrê ya Şirnexê daxuyaniyek hate dayîn. Parlementera DEM Partiyê ya Şirnexê Newroz Ûysal Aslan, endam û rêveberên partiyên siyasî û saziyên civakî yên demokratîk û bi sedan welatî tev li daxuyaniyê bûn. Di daxuyaniya ku êrişên çeteyan ên li dijî taxan hatin şermezar kirin de beşdaran bi yek dengî diruşmên, “Bijî berxwedana Rojava” , “Rojava Rûmeta me ye” û “Rojava Rojhilat Kurdistan e yek welat” hatin berzkirin.
Hevserokê DEM Partiyê yê Şirnexê Ramazan Ûysal di daxuyaniyê bang li gelê Kurd û gelên herêmê kir ku ji bo rawestandina êrîşan dengê xwe derxînin û bertek nîşan bidin.
‘Divê ev êriş demildest rawestin’
Parlementer Newroz Ûysal Aslanê jî bertek nîşanî êrîşên li ser taxên Eşrefiye, Şêxmeqsûd û Benî Zêdê da û wiha got: “Gelê me yê li van taxan ev 12 sal in li hember hemû hêzên çetewarî li ber xwe dide û pergalek demokratîk ava kiriye. Em ji vê derê dibêjin, ev êrîş planek be, lihevkirineke çeteyan û hin dewletan be, çi bibe bila bibe tişta tê kirin sûcê mirovahiyê ye. Tişta ku li Helebê diqewime li hember hemû gelê Sûriyeyê ye. Kesên ku li Helebê li ber xwe dide em bi wan re ne. Em dizanin tiliya dewleta Tirk di van êrîşan de heye. Li Helebê êriş, li bakurê Kurdistanê aştî nabe. Em careke dibêjin gelê Kurd wê biserkeve û divê ev êrîş demildest rawestin.”
Daxuyanî bi berzkirina durişma, “Bijî berxwedana Rojava” bi dawî bû.
Welatî li Taxa Yafesê bi girseyî meşiyan
Li aliyê din li taxa Yafesê ya navçeya Cizîrê jî bi sedan welatiyan bi diruşma, “Bijî berxwedana Rojava” meş lidarxistin. Piştî ku girse li nava kolanên Cizîrê meşiya, polîsan xwe li meşa girseyî ranegirt û êrîşî girseyê kir. Welatiyên li kolanan jî bi çepikan piştgirî dan meşê.
Polîsên ku êrîşî girseyê kirin, 3 welatî bi tundiyê binçav kirin. Polîsên ku ji rojnamegerên çalakî dişopand re xeber gotin, bi binçavkirinê tundî li wan xwar.
