Bi îdiaya “Heqaret li serokkomar kiriye” salek û 5 meh û 15 roj cezayê hepsê li Selahattîn Demîrtaş birî. Hevserokê DEM Partiyê Tuncer Bakirhan bertek nîşanî birîna ceza da.
Bi hinceta axaftinên di navbera salên 2015-2016an de kiriye, derbarê Hevserokê Giştî yê HDPê yê berê Selahattîn Demîrtaş de bi îdiaya “heqaret li serokkomar kiriye” doz hatibû vekirin. Danişîna biryarê ya dozê li 14emîn Dadgeha Cezayên Giştî ya Mêrsînê hat lidarxistin. Demîrtaş tev li danişînê nebû lê parêzerên wî amade bûn.
Parêzeran, li dijî mutalayê dem xwestin. Lê dadger bi sedema ku di danişîna din de dem dabû, ev daxwaz red kir. Li ser vê yekê parêzeran bi sedema ku mafê parastina adilane hatiye binpêkirin, xwestin dadger bê guhertin. Ev daxwaz jî hate redkirin.
Dadger, got ku daxwaza tevlibûna Demîrtaş a dozê bi îdiaya “ewlehiyê” hatiye redkirin.
Dadgehê ji ber axaftinên Demîrtaş ên li Mêrsîn û Amedê, bi îdiaya “li pey hev heqaret li serokkomar kiriye” salek û 5 meh û 15 roj cezayê hepsê li Demîrtaş birî.
Bakirhan bertek nîşan da
Hevserokê Giştî yê DEM Partiyê Tuncer Bakirhan li ser hesabê xwe yê Xê daxuyanî da û nerazîbûn nîşanî birîna ceza da û got: “Em cezabirîna li hevrêyê me Selahattîn Demîrtaş ku bi hinceta heqaret li Serokkomar kiriye qebûl nakin û red dikin. Em vê biryarê nas nakin.
Biryarên bi vî rengî li pêşiya avakirina aştiyê astengiyên mezin derdixe. Ev biryarên wiha bêedaletiyê mezin dikin û darbeyê li hêviya aştiyê dixe. Divê ev hiş û aqilê darbekar demildest bê rawestandin. Divê rêzdar Demîrtaş û hemû girtiyên siyasî demildest bên berdan. Rêya aştiyê ne bi biryarên darazê yên darbekar bi azaadiyê û edaletê dikare were hûnandin.”
