Ji bo rojnameger û nivîskar Huseyîn Aykol li Wanê şîn hat danîn û bi sedan kesan serdana şînê kir. Di şînê de hate destnîşankirin ku dê xwedî li şop û mîrateya Huseyîn Aykol bê derketin.
Mamosteyê Çapemeniya Azad Huseyîn Aykol di şeva sersalê de li Enqereyê jiyana xwe jî dest dabû. Bi pêşengiya Komeleya Rojnamegeran a Dîcle Firatê (DFG) û Komeleya Rojnamegerên Jin ên Mezopotamyayê (MKG) li eywana ŞanoWanê ya şîn hat danîn û bernameyê bîranînê hat lidarxistin.
Li eywanê wêneyên Huseyîn Aykol hat danîn û find hatin vêxistin. Parlamenter û hevşaredarên navend û navçeyan ên Wanê, rêxistinên DEM Partî û DBPê yên Wanê, Dayikên Aştiyê, TJA, nûnerên saziyên sivîl û gelek kes tev li bernameyê bûn.
Bername ji bo şehîdên çapemeniya azad bi deqeyekê rêzgirtinê dest pê kir. Piştî rêz girtinê sinevîzyona kurtejiyana Huseyîn Aykol vedigot, hate nîşandan. Paşê peyama Rêberê Gelê Kurd Abdullah Ocalan ya ji bo bîranîna Huseyîn Aykol şandibû, hat xwendin.
‘Em ê xeyala mamoste Huseyîn bi cîh bînin’
Seroka Nûnertiya Komeleya Rojnamegerên Jin a Mezopotamyayê ya Wanê Oznur Deger axivî û bi bîr xist ku Huseyîn Aykol pêşengê çapemenîya azad bû û got: “Mamoste Huseyîn girtîyên siyasî tu caran bi tenê nedihişt. Daxwaza wî ya sereke bi Abdullah Ocalan re roportajek bû. Em soz didin ku em ê vê xeyala wî bi cîh bînin û çapemenîya azad dê li dû şopa wî bimeşe.”
‘Em ê li pey şopa mamoste Huseyîn bimeşin’
Endamê Komeleya Rojnamegeran a Dîcle Firatê Onder Akbulut da zanîn ku çapemeniya azad gelek bedel dane û got: “Em jî weke çapemeniya azad tu caran nahêlin ku heqîqet di tariyê de bimîne. Em ê di rêya heqîqetê de û li pey şopa mamoste Huseyîn Aykol bimeşin.”
Hevberdevkê Platfroma Saziyên Demokratîk a Wanê Cemal Demîr jî diyar kir ku ew ê xeyalên şehîdên çapemenîya azad bicih bînin.
Hevseroka DEM Partiyê ya Wanê Gulşen Kurt jî destnîşan kir ku Huseyîn Aykol dengê hemû girtiyên siyasî û dengê aştî û azadîya gelan bû.
Hevşarêdarê Bajarê Mezin ê Wanê Abdullah Zeydan jî bi bîr xist ku mamoste Huseyîn bi jiyaneke rûmet xebata çapemeniyê birêve bir û bû pêşengê çapemeniya azad.
‘Em ê xwedî li mîrateya wî derkevin’
Hevberdevka Înîsiyatîfa Yekîtiya Demokratîk û parlementera Wanê Gulcan Kaçmaz Sayyîgît jî da zanîn ku mamoste Huseyîn pir dixwest biçe Rojavayê Kurdistanê û li wan kolanên berxwedanê bibîne. Gulcan Kaçmaz Sayyîgît anî ziman ku ew dê xwedî li mîrateya Huseyîn Aykol derbikevin.
Bername piştî axaftinan bi dawî bû. Dê şîn heta saet di 17.00an de bi dawî bibe.
