Serokê Dewletên Yekbûyî yê Amerîkayê (DYA) Donald Trump cereke din hişyarî da Îranê û gef li Îranê xwar. Trump got hek Îran êrişên kuştinê ya li dijî çalakgeran bidomîne dê Amerîka alîkariya xwepêşandêran bike.
Li Îranê û Rojhilatê Kurdistanê xwepêşandana li ser krîza aborî roja 28ê Kanûna 2025ê dest pê kir, li tevahiya Îranê belav bû. Bi taybet jî li Rojhilatê Kurdistanê bajarê Îlam û Kirmanşanê jî ji xwepêşandanan re pêşengiyê dike. Di roja 4ê Çileya 2026ê de hêzên rejîma Îranê li van her du bajarên Kurd gule li çalakgerên Kurd reşandin û li her du bajaran bi kêmanî 8 Kurd hatin kuştin.
Gelên Îranê bertek nîşanê gefên Xamaney da
Her ku diçe xwepêşandan mezin dibe. Serokê Olî yê Îranê Xamaney jî derbarê mijarê de daxuyanî da. Di daxuyaniyê de da zanîn ku li Îranê bê îstîkrarî heye. Xamaney da zanîn ku dikandar ji vê xesarê dibînin û dikandar mafdarin ku wan hişyar bikin û got: “Lê nabe ku kes li dij rejîmê derkeve û xwepêşandanê bike. Heke xwepêşandan mezin bibe dê êrişî wan bê kirin.”
Trump: Em Îranê baş nas dikin
Xwepêşandanên li Îran û Rojhilatê Kurdistanê pêk tên ji qada navneteweyî ve jî ji nêz ve tê şopandin. Ji ber ku hêzên rejîma Îranê êrişeke bê ser û ber li dijî xwepîşandêran pêk tîne û çalakgeran dikuje bertekên navneteweyî jî her diçe zêde dibin. Serokê Amerîkayê Doneld Trump derbarê mijarê de roja yekşemê di balafira Serokatiya Amerîkayê “Air Force One” de ji rojnamegeran re axivî û peyamên hişyariyê yên tund dan rejîma Îranê. Trump di hişyariyê de got: “Em Îranê baş nas dikin û geşedanan ji nêz ve dişopînin. Eger ew dest bi kuştina xelkê bikin, wekî ku di rabirdûyê de kirine, ez bawer im ew dê ji aliyê Amerîkayê ve derbeyeke pir giran bixwin.” Trump gefa xwe bi vê awayî pênase kir: “Em bi çekên xwe amade ne.”
Trump çend roj berê jî hişyarî dabû Tahranê
Serokê Amerîkayê Donald Trump çend roj berê jî li ser hesabê xwe yê tora civakî ya Truth Socialê daxuyaniyeke tund belav kiribû û gefa mudaxeleyê li Îranê xwaribû. Trump di gefxwarinê de jî gotibû ku Îran xwepêşandêrên aştîxwaz gulebaran bike û bi awayekî hovane bikuje ku dê ew li hawara xwepêşadêran biçin.
Netenyahu: Min û Trump di nava xwe de nîqaş kir
Serokwezîrê Îsarîlê Benjamîn Netenyahu jî duh di civîna hikûmeta Îsraîlê de Îranê hişyar kiribû û gotibû ku wî û Trump rewşa Îranê di nava xwe de nîqaş kirin e.
Xwepêşandan belav dibin
Xwepêşandan bi giranî ji ber rewşa aboriyê roja 28ê Kanûnê li Tahranê dest pê kir û di demeke kin de xwepêşandan li bajarên Kirmanşan, Loristan, Îlam, Çarmehal û Bextyarî, Qûm, Xûzistan, Fars, Îsfehan, Hemedan û Meşhedê belav bûn. Xwepêşandan li gelek bajaran didomin û hêzên rejîma Îranê êriş dibe ser xwepêşandêran.
