Amed – Rêveberên Şaxa OHDa Amedê Mehmet Sonmez û Gulbahar Ateş, têkildarî girîngiya mitînga “Hêvî û Azadiyê “ axivîn û wiha gotin: “Divê her kes tev li mitîngê bibin û xwedî li azadî û aştiyê derkevin.”
Şaxên Komeleya Hiqûqnasên Ji Bo Azadiyê (OHD) li gelek bajaran têkildarî girîngî û beşdariya mitînga “Hêvî û Azadiyê” ku dê di 4ê Çileyê de li Qada Îstasyonê ya Amedê were lidarxistin, daxuyanî dan. OHDê di daxuyaniya xwe de diyar kir ku sepandina mafê hêviyê; dabînkirina azadiya fîzîkî ya birêz Abdullah Ocalan; bidawîanîna hiştina derveyî hiqûqê ya Kurdan û hemû beşên civakê û avakirina hiqûqa entegrasyona demokratîk, şertê bingehîn ê aşitiyeke rastîn û mayinde ye. Yek ji van şaxan jî ya Amedê bû. Rêveberên Şaxa OHDa Amedê Mehmet Sonmez û Gulbahar Ateş jî têkildarî girîngiya mitîngê û bicihanîna “Mafê Hêviyê” ji ajansa me re axivîn.
Armanc ew e ku mijara ‘Mafê Hêviyê’ têxin rojeva dewletê
Mehmet Sonmez diyar kir ku bi lidarxistina mitîngê armanca wan ew e ku mijara “Mafê Hêviyê” têxin rojeva dewletê jî wiha got: “Dema ku di mijara Mafê Hêviyê de çareseriyek nebe, li ser vê yekê rastkirinek an jî qanûneke nû neyê çêkirin û ev maf nekeve meriyetê; bi tu awayî hiqûqa Tirkiyeyê jî rasterast nabe hiqûqeke demokratîk. Mafê hêviyê bi giranî bi birêz Ocalan tê penasekirin. Jixwe rasterast bi wî re eleqedar e. Lê wekî din, ji bilî wî ev mafê gelek kes û mirovên din heye. Ji ber vê yekê pêwîst e, di derheqê Mafê Hêviyê de sererastkirinek çêbibe û bibe qanûn û bikeve meriyetê.”
‘Em hêvî dikin ku mitîng bibe wesîleya pêkhatine mafê hêviyê’
Sonmez, da zanîn ku wekî OHD xebatên wan ên têkildarî mitîngê li kolanan didomin û wiha berdewam kir: “Em xwe digihînin gel, qala giringiya mijarê dikin. Gelek kes dixwazin di derheqê vê mijarê de gotina xwe û hêviya xwe bînin ziman. Ji xwe her kes di ferqa vê mijarê de ye. Dadgeha Mafê Mirovan a Ewropayê (DMME) derbarê vê mijarê de du caran biryara binpêkirinê daye. Ji bo wê yekê jî gelek hêvî hene, ji ber wê hêviyeke mezin heye ku Mafê Hêviyê bi cih were. Em jî hêvî dikin ku ev mitîng bibe wesîleya ku ev tişt pêk were. Gelên Kurdistanê dibêjin kesê ku vê pêvajoyê bi rê ve dibe birêz Abdullah Ocalan e, dema ew azad nebe ev pêvajoya tê meşandin rast nameşe.”
Banga tevlibûnê
Sonmez, di dawiya axaftina xwe de ji bo mitîngê ev bang kir: “Em hêvî û em daxwaz dikin ku gelê me xwedî li mitîngê derkeve û tevlîbûneke pir zêde xwe di nav mîtîngê de cihê xwe bigire û di vê mîtîngê de jî, daxwaz û hêviyên xwe bîne ziman.”
Biryara DMMEyê
Gulbahar Ateşê jî bal kişand ser biryara DMMEyê ya derbarê Rêberê Gelê Kurd Abdullah Ocalan de û wiha got: “Lê mixabin heta niha ji aliyê Tirkiyeyê ve ji bo bicihanîna vê biryarê hêj tu gav nehatine avêtin.”
Girîngiya lidarxistina mitîngê
Ateşê têkildarî girîngiya lidarxistina mitîngê ev tişt gotin: “Wekî rêzdar Ocalan diyar dike; prensîba hêviyê gavek e ku hewce ye dewlet biavêje ye. Ne tenê ji bo şexsiyeta wî, ji bo hemû gelan. Mafê hêviyê hemû civakê eleqedar dike. Ji ber ku prensîba hêviyê li cihekî parastina mafê mirovan e ji bo civakê, divê em vê girîngiyê li ber çavan bigirin. Em jî weke Komeleya Hiqûqnasên ji bo Azadiyê (OHD) dibêjin ku; bicihanîna Mafê Hêviyê, bi dabînkirina azadiya birêz Ocalan pêkan e.”
‘Divê hemû gel xwedî li aştî û azadiyê derbikeve’
Gulbahar Ateşê jî têkildarî mitînga “Hêvî û Azadiyê” ev bang kir: “Em weke OHD bang li hemû gelê xwe û hevalên xwe yên hiqûqnas dikin ku di 4ê Çileyê de tev li vê mitîngê bibin. Xwedî li aştî û azadiyê derbikevin. Wê berpirsyartiyê bigirin ser mile xwe. Ji bo çareserkirina pirsgirêka Kurd û ji bo ev pêvajo bi awayekî hiqûqî pêş bikeve, hewce ye desthilatdarî hîn gavên hiqûqî jî bavêje. Di serî de di şexsê Birêz Ocalan de, hemû girtiyên siyasî û hevalên ku di girtîgehan de bi awayekî bêhiqûqî têne girtin, divê bigihîjin azadiya xwe ya fîzîkî. Mafê Hêviyê ji bo hemû civakê girîng e.”
