Serokê Meclîsê Numan Kurtulmuş piştî civîna komîsyonê diyar kir ku ji bo lîstikên emperyalîstan vala bên derxistin divê biratî xurt bibe û got: “Helbet biratî bi tenê gotinan nabe ez di ferqê de me ku ji bo hewcehiyên hiqûqa biratiyê pêk were, gav bên avêtin.”
Civîna 20emîn a Komîsyona Meclîsê bi axaftinên Dr. Murat Sevencan û Prof. Dr. Havva Kok Arslan ku li ser girtekan analîzek akademîk amade kiribûn û endamên komîsyonê yên partiyên siyasî bi dawî bû. Piştî civînê hat diyarkirin ku xebatên komîsyonê 2 mehan hatiye dirêjkirin.
‘Hiqûqa biratiyê hewce dike’
Serokê Meclîse Numan Kurtulmuş piştî civînê axivî û anî ziman ku ji bo avakirina aştî û biratiyê dema wan zêde nemaye û wiha got: “Dema em li geşedanên li cîhanê diqewimin dinêrin, divê em eniya hundirîn xurt bikin. Divê em lîstikên emperyalîstan li ser erdnîgariya me vala derxînin. Rêya wê jî avakirina biratiyeke ku heta qiyametê berdewam bike ye. Helbet biratî tenê bi gotinan nabe ez di ferqê de me ku ji bo hewcehiyên hiqûqa biratiyê pêk were, divê gav bên avêtin. Heke em li gorî ruhê demê tevnegerin ne tenê xebatên komîsyonê têk diçin di heman demê de mixabin Tirkiye jî ji vê firseta dîrokî re deriyê xwe digire. Ji bo wê jî divê her kes berpirsyariya dikeve ser milê wan pêk bîne. Ez hêvî dikim em van xebatên xwe bigihînin encamekê.”
