Komîsyona Jinan a OHDa Amedê têkildarî heqaret û çêrên li dijî siyasetmedara Kurd Leyla Zana şermezar kir û Komîsyonê got ku ev heqaret û êriş bi awayek organîzekirî hat kirin û xwest TFF û rayedarên darazê dest bi lêpirsînek bi bandor bikin.
Komîsyona Jinan a Komeleya Hiqûqnasên Ji Bo Azadiyê (OHD) a Şaxa Amedê bi boneya heqaeret û çêrên li dijî siyasetmedara Kurd Leyla Zana di maça Bursasporê û Somasporê de hatin kirin, li ber Edliyeya Amedê daxuyanî da û şermezar kir. Rêveberên partiyên siyasî, Dayikên Aştiyê, saziyên jinan û rêxistinên sivîl piştgirî dan daxuyaniyê. Di daxuyaniyê de pankart “Leyla Zana rûmeta me ye” hat vekirin û dirûşmeya “Leyla Zana rûmeta me ye” hate berzkirin.
Daxuyanî Hevseroka Giştî ya OHDê Ekîn Yeter bi Tirkî hate xwendin.
‘Bursaspor nefretê li ser nasnameya Kurdan dike’
Ekîn Yeter diyar kir ku heqaretên li Leyla Zana hatine kirin nayê qebûlkirin û got: “Em vê heqaretê weke êrişek organîzekirî ya ku pergala serdest a mêr û kodên nijadperestî dibînin. Êriş û heqaretên nijadperestî bi alîgirên Bursasporê hate destpêkirin, li gelek maçên din jî berdewam kir. Ev yek nîşan dide ku ev pratîk beşek ji polîtîkayên lînckirinê yên sîstematîk in, bi zanebûn û plankirî ne. Gruba alîgirên Bursasporê demek dirêje bi liv û tevgerên xwe yên nefretê li dijî nasnameya Kurdan didomînin.”
Bang li TFFê û darazê hate kirin
Ekîn Yeter da zanîn ku ew ê dest ji vê meseley3e bernedin û bang li TFFê û rayedarên darazê kir ku li dijî van heqaret û êrişan dest bi lêpirsînek bi bandor bikin.
Endamê OHDê Gulbahar Ateş jî derheqê mijarê de bi Kurdî ji ajansa me re axivî.
‘Ev heqaret li dijî hemû gelê Kurd bû’
Piştî daxuyaniyê Endama OHDê parêzer Gulbahar Ateş derheqê bûyerê de axivî û wiha got: “Ev heqaret û neheqî li ser medyaya civakî jî gelek hate belavkirin. Di 16ê Kanûnê de navbera Bursasporê û Somasporê maçek hate lîstin. Di vê maçê de alîgirên tîman bi awayekî nijadperest, zayendperest, heqaret li ser şexsiyeta Leyla Zana kirin. Lê em baş dizanin ku ev heqaret ne tenê ji bo şexsê Leyla Zana bû, ev heqaret li dijî îradeya gelê Kurd û jinan bû. Heqareta ku hatiye kirin di şexsê Leyla Zana de li ser hemû gelê Kurd hate kirin. Em dizanin ku di ji bo van heqaretan ew faîl nayên cezakirin. Necezakirin rê li ber heqaretên din vedike. Em jî wek Komîsyona Jinan a Komeleya Hiqûqnasên Ji Bo Azadiyê şopdarê vê pêvajoyê ne.”
