Wezareta Perwerdehiyê ya Tirkiyeyê ji bo bişaftina zarokan 56 mamosteyan dişîne rojavayê Kurdistanê û Sûriyeyê.
Dewleta Tirk bi dehan salan e di her alî de xebatên bişaftinê li ser gelê Kurd dimeşîne. Ji dibistanên seretayî bigire heya zanîngehan zarokên Kurd bi polîtîkayên bişaftinê re rû bi rû dimînin. Gerîndetiya Giştî ya Perwerdeya Derveyî Tirkiyeyê ku di bin banê Wezareta Perwerdehiyê ya Tirkiyeyê de xebatan dimeşîne rêbera mamosteyên ku bişîne derveyî Tirkiyeyê weşand. Li gor vê rêberê dewleta Tirk wê gelek mamosteyên bişaftinê bişîne rojavayê Kurdistanê û Sûriyeyê.
56 mamosteyên bişaftina zarokan
Li gor rêbera Wezaretê di malpera xwe ya fermî de weşandiye; dewleta Tirk dê 56 mamosteyan bişîne Sûriyeyê û rojavayê Kurdistanê û mamosteyên biçin bajarên Kurdan wê polîtîkayên bişaftinê bibin derveyî bakurê Kurdistanê jî.
Tê payîn ku mamosteyên bişaftinê bişînin Efrîn û Serêkaniyê
Li gorî rêbera hatiye weşandin nayê diyarkirin ka ev mamosteyên bişaftinê dê li kîjan bajaran werin peywirdarkirin lê dewleta Tirk dema bajarên rojavayê Kurdistanê yên weke Efrîn û Serêkaniyê dagir kirin li van bajaran dest bi avakirina dibistanên perwerdehiya Tirkî kiribû. Tê payîn ku ev mamosteyên bişaftinê li van bajarên Kurdan werin peywirdarkirin.
Beşa Zaningeha Dîlokê li Efrînê çi dike?
Dewleta Tirk xebatên bişaftinê tenê ne bi rêya şandina mamosteyan dike, her wiha bi avakirina Fakulteya Perwerdeyê ya Efrînê ku di bin banê Zanîngeha Dîlokê de hatiye avakirin polîtîkayên bişaftinê berfireh dike.
