Fermandarê giştî yê HSDê Mazlûm Ebdî anî ziman ku peymana 10ê Adarê dîrokî ye û dê bibe esasê hêza Sûriyeyê. Serokkomarê Tirk Erdogan jî diyar kir ku dê pêkanîna Peymana 10ê Adarê dê îradeya gelên Sûriyeyê bi hêz bike.
Fermandarê giştî yê Hêzên Sûriya Demokratîk (HSD) Mazlûm Ebdî beşdarî pîrozbahiya salvegera 10emîn a damezirandina Meclîsa Sûriyeya Demokratîk (MSD) bû. Pîrozbahiya salvegerê li bajarê Hesekê hat lidarxistin.
Mazlûm Ebdî di pîrozbahiyê de axivî û têkçûna rejîma Baasê wek destpêka projeya Sûriyeya nû bi nav kir û got rejîma Esed di encama biryardarî û têkoşîna dehan salan a tevahiya pêkhateyên Sûriyeyê de ket.
Mazlûm Ebdî got: “Ketina Esed qonaxa pêşîn a şoreşê bû. Kêfxweşiya Sûriyeyê dê temam nebe heta ku daxwazên wan bi cih neyên. Armanca gelê Sûriyeyê ji xistina rejîmê avakirina sîstemeke nû ya li ser esasê azadiyê bû. Ji bo armancên şoreşê pêk werin divê sîstemeke nû ya li ser bingeha azadiyê were avakirin. ”
Ebdî di dewama axaftina xwe de bi bîr xist ku rejîma Baasê rejîmeke zordest bû li ser esasê yekrengiyê kar dikir, li hemberî vê yekê divê tevahî pêkhateyên Sûriyeyê welatê xwe ava bikin û bi rê ve bibin.
Mazlûm Ebdî destnîşan kir ku civata navneteweyî bi ketina rejîma Baasê kêfxweş e û derfet da Sûriyeyê da ku cihê xwe di qada navneteweyî û Rojhilata Navîn de bigire, her kes kar dike da ku Sûriye gavan biavêje. Her wiha got: “Em dizanin dê kî Sûriyeyê vegerîne cihê wê yê girîng, ew jî eniya hundirîn a Sûriyeyê bi xwe ye.”
‘Peymana 10ê Adarê dê bibe hêza Sûriyeyê’
Fermandarê giştî yê HSDê bal kişand ser peymana 10ê Adarê ku bi hikumeta veguhêz a Sûriyeyê re îmze kir û ev tişt got: “Bi armanca ku Sûriyeyeke nû bi rêya lihevkirinan ava bibe û şer were rawestandin, par mîna van wextan em bi hikumeta veghêz re ketin nava têkiliyan. Di encamê de bi alîkariya hin dostên me hevdîtin çêbûn û peymana 10ê Adarê hat îmzekirin. Ji demekê ve em li gorî peymanê kar dikin.”
Ebdî, peymana 10ê Adarê wek bingeha Sûriyeya nû bi nav kir û ev li gotinên xwe zêde kir: “Bendên peymanê bendên dîrokî ne. Dê bibin bingehên hêza Sûriyeyê. Civata navneteweyî û herêmî piştgiriyê didin peymanê. Em wek HSD û Rêveberiya Xweser ji her kesî bêtir pabend in. Em dizanin ku peyman bingeha Sûriyeya nû ye.”
‘Peyman welatên derdorê jî eleqedar dike’
Mazlûm Ebdî diyar kir ku pêvajo ne pêvajoyeke normal e, lê hestiyar e û wiha dom da axaftina xwe: “Pêşketin hene. Peyman welatên cîran jî eleqedar dike. Welatên cîran wekî berê ne li dijî me ne. HSD ne hinceta şeran e. Em ji çareseriyq li gorî peymana 10’ê Adarê re amade ne. Em ji her kesî dixwazin ku piştgiriyê bidin pêvajoyê. Wek HSD û hêzên asayîşê me di çaçroveyeke giştî de li hev kir û şandeyên me detayan nîqaş dikin.”
Erdogan: Pêkanîna Peymana 10ê Adarê dê îradeyê bi hêz bike
Serokkomarê Tirkiyeyê Tayyîp Erdogan di vegera ji Turkmenistanê de di balafirê de pirsên rojnamegeran bersivand.
Tayyîp Erdogan bal kişand ser Peymana 10ê Adarê ya di navbera HSDê û Hikûmeta Demkî ya Şamê de û got: “Li Sûriyê pêkanîna peymana 10ê Adarê pêvajoyek dahatûya herêmê ji nêz ve eleqedar dike ye. Ku peyman bigihe armancên xwe dê ji bo Sûriyê encamên gelek qenc bide. Bi pêkhatina peymanê dê yekpariya axê, yeîtîk, hevirî, îstîkrar û meşa Sûriyê ya ber bi pêşerojê ve qewî bibe. Derket holê ku cudabûn, şer û pevçûn tiştek bi Sûriyê nade qezençkirin. Girîng e ku rêvberiya Sûriyê bi vîzyona ku hemû pêkhateyên Sûriyeyê re digire nav xwe tevbigere. Ev nêzîkatiyek nirxbûhaye û divê piştgirî lê bê kirin. Mimkûn e ku xeyal û planên gelek derdoran ji bo Sûriyê hebe. Lê ya girîng hevpariya pêşerojê ya gelê Sûriyê ye. Xeyalên rasteqîn ji hêla gelê Sûriyê yê cefakar ve tê dîtin. Bi pêkhatina peymanê dê lîstikên derdorên dafikan datînin vala derxe. Em bêyî ferq û cudahî aramî û aştiya Ereb, Kurd, Sunî û Nusayrî dixwazin. Bêguman pêkanîna Peymana 10ê Adarê dê vê îradeyê bi hêz bike.”
