Roja 3yemîn ya 1emîn Mîhrîcana Muzîkê ya Bajêr bi kelecan û coş didome. Dengbêj Meryem ku axaftineke kurt kir, bang li malbatan kir û daxwaz kir ku divê zilam pêşiya jinên ku dixwazin bibin dengbêj negirin.
Yekemîn Mîhrîcana Muzîkê ya Wanê ku bi pêşengiya Platfomra Muzîkê ya Bajêr tê lidarxistin, di roja 3yemîn de bi hemû kelecana xwe berdewam kir. Di çarçoveya bernameya îro de Koma Siyabo û KomKurd derketin ser dikê konserên xwe ji bo guhdaran dan. Taybetî zarokan eleqeyeke mezin nîşanî mîhrîcana ku li Taxa Bostanîçî ya navçeya Rêya Armûşê ya Wanê tê lidarxistin, da. Hevşaredarê Bajarê Mezin ê Wanê Abdullah Zeydan, Hevserokê Partiya Wekhevî û Demokrasiyê ya Gelan (DEM Partî) Veysî Dîlekçî û gelek welatî tev li mîhrîcanê bûn.
Koma Siyabo bi cilên Kurdî derket ser dikê
Ewilî Koma Siyabo ku salek beriya niha bi armanca parastina stranên gelêrî û dîrokî hatiye avakirin, derket ser dikê. Komê ku hemû endamên wê cilên Kurdî li xwe kiribûn, stranên xwe yên piranî ji stranên gelêrî yên Colemêrgê pêkdihat ji bo guhdaran got û guhdaran jî bi çepikan kêfxweşiya xwe nîşan dan. Piştî konserê dengbêjên jin Dengbêj Mûkaddes û Dengbêj Meryem plaket da endamên Koma Siyabo. Dengbêj Meryemê axaftineke kurt kir û bang li malbatên Kurd kir. Dengbêj Meryemê diyar kir ku divê zilam di nava malbatê de pêşiya jinên ku dixwazin bibin dengbêj negirin û berovajî vê yekê rêya wan vekin.
Dûre KomKurd bi derket ser dikê starên xwe yên ji Koma Amed, Ciwan Haco û gelek stranên navdar ên Kurdan gotin. KomKurdê guhdar coşandin û guhdaran demên xweş derbas kirin. Piştî stranan Endama Platforma Muzîkê ya Bajêr Zozan Ozbeyê plaket da komê û bernameya îro bi dawî bû.
Sibê jî dê di saet 17.00an de Ferec û di saet 18an de jî Lez û Bez derbikevin ser dikê.
