Çalakiyên Festîvala Orkêş a Muzîkê ya 3yemîn li bajarê Hesekê bi amadebûna dehan hunermend, rewşenbîr, helbestvan di roja duyemîn de didomin.
Li hola Serdem a bajarê Hesekê yê kantona Cizîrê roja 2yemîn a çalakiyên Festîvala Orkêş bi amadebûna dehan hunermend, rewşenbîr, helbestvan û hezkiriyên hunerê dewam kirin.
Di roja 2yemîn de her komeke muzîkê di 20 deqeyan de berhemên xwe yên hunerî pêşkêş kirin. Di serî de koma Roj – Zaxo stranên ji Başûrê Kurdistanê pêşkêş kirin. Piştre koma Saya Nova – Ermen stranên Ermenî û koma Vejîn – Hîlala Zêrîn – Heleb bi rêya vîdyo stran pêşkêş kirin. Her wiha komên ji bajarên Reqa, Hesekê û Amûdê jî stranên xwe pêşkêş kirin.
Helbestvan-nivîskar Hekîm Sefqan bi rêya vîdyo lidarxistina Festîvalê pîroz kir, diyar kir ku hemwextî pêşketina teknolojiyê metirsî li ser muzîkê, bi taybetî muzîka Kurdî heye û got: “Lidaxistina wekî van Festîvalan gaveke hêjayî rêzgirtinê ye.”
Piştre, hunermend Etab Ebû Seide ji Siwêdayê pîrozbahî ji mihrîcanê re şand, girîngî da xurtkirina têkiliyên çandî di navbera pêkhateyan de.
Çalakiyên Festîvalê sibe bi dawî dibin.
