Amed – Şêniyên gundê Husika ku li ber çêkirina kanên madenê radibin diyar kirin ku ew ê nehêlin gundê wan û xwezaya wan bê talankirin.
Desthilata AKPê bi rêya şirketan talankirina xwezaya Kurdistanê ji xwe re kiriye armanc. Bi salan e li gelek bajarên Kurdistanê polîtîkayên talanê dimeşîne. Di 25ê Mijdarê de bi sedan leşker bi maşîneyên zirxî ji bo parastina kana ponzê ya Şîrketa Oyak Çîmentoyê ketin gundê Goma Husika yê navçeya Çinara Amedê. Şîrket ji bo ku li ser girên gund kana madenê veke zordariyê dike. Gundî û komeleyên ekolojiyê li dijî talana xwezayê bertek nîşan didin, hewl didin pêşî li talanê bigirin. Derheqê mijarê de şêniyên gund nerazîbûna xwe anîn ziman û gotin ew ê nehêlin xwezaya wan bê talankirin.
Şêniyên Goma Husika bertek nîşanî Şîrketa Oyak Çîmentoyê û desthilatdariyê dan û diyar kirin ku ew girên ku dixwazin kana madenê lê vekin cihê çandîniyê û xwedîkirina pezê gund e.
‘Me bikujin jî em axa xwe bernadin’
Yek ji şêniyên gund Hesîbe Turgay bertek nîşanê şirketê da û da zanîn ku kana madenê li vê derê bê vekirin dê jîngeha wan bibe çol û got. “Em girê xwe nadin, em darên xwe bernadin, cotgehên me tunene, em ajalên xwe li vir xwedî dikin, me bikujin jî em dest ji axa xwe bernadin.”
‘Wê cihên me yên pîroz xera bikin’
Şêniya gund Sidika Turgay jî diyar kir ku ev gir cîhê xwedîkirina ajalên wan e û got: “Goristana me li wî girî ye, ziyaret heye li wir, ev cihên me yên pîroz dê bên xerabkirin. Ajalan me li van giran debara xwe dikin. Li vî gundî jin biqedin, zilam biqedin, gede biqedin dîsa jî em dest ji warê xwe bernadin. Me çi li wan kiriye tên belaya xwe li me didin, bila ji me dûr bikevin.”
‘Em canê xwe didin dareka xwe nadin’
Gundiyê bi navê Dogan Turgay jî serdegirtina gund a Şîrketa Oyakê û leşkeran wek bêrêzî nirxand û got: “Ew der cihê bav û kalên me ye, em li van deran jiyana xwe didomînin, em bi tu awayî dest ji doza xwe bernadin. Em canê xwe didin dareka xwe nadin”
