Şîrketa madenê bi leşkeran ve avêt ser ser gundê Husika ya navçeya Çinarê. Şeniyên gund li dijî şîrketê rabûn û ji bo parastina axa xwe dest bi çalakiya nobetê kirin û gotin dê rê nedin talankirina axa gundê xwe.
Yek ji cihên ku xwezayê wê tê talankirin jî bajarê Amedê ye. Li gundên navçeyên Amedê bi destê şîrketên nêzî desthilatê her derê kirine cihê talankirinê. Yek ji cihên ku şîrketa madenê çavê xwe berdayê jî gundê Husika ya ser bi navçeya Çinara Amedê ve ye.
Bi salane tevî ku xelkê gundê Husika xwedî li axa xwe xwedî derdikevin û li ber xwe didin jî lê şîrketa madenê bi desteka leşkeran axa gundiyan talan dike. Vê sibehê şîrket bi leşkeran ve dîsa bi ser gund de girt. Xelkê gund li ber vê rabûn û li dijî şîrketê û leşkeran dest bi çalakiyê kirin.
Leşkeran ketin û derketina ji gund qedexe kir
Leşkeran ketina gund dorpêç kir û nehişt kes bikeve gund û derkeve. Rêveberên rêxistinên DEM Partî û DBPê yên navçeya Çinarê, Hevşaredarên Çinarê, Meclîsa Ekolojiyê ya Amedê û gelek kes li dijî talanê û dorpêçê xwestin biçin gund lê leşkeran rê neda.
Girseyê li dijî qedexeya ketina gund dest bi nobetê kir. Piştî çalakiyê leşker ji gund vekişiyan. Di qedexekirina ketin û derketina ji gund welatiyên gund nikaribûn binçin nexwşxaneyê û zarok nekaribûn biçin dibistanê.
‘Em ê rê nedin şîrketa madenê’
Piştî leşker ji gund vekişiyan girseyê daxuyanî da. Ewilî ji şeniyên gund Şaban Turgay axivî. Şaban Turgay diyar kir ku bi hezaran leşkeran vê sibehê avêtiye li ser gundê wan û got: “Îro tiştên ku li vir pêk hatin hemû ji bo berjewendiyên şexsekî ye. Bi hezaran leşker ji bo şîrketa madenê hatin bi ser gund de girtin. Nehiştin gundî ji gund derkevin. Çi bikin bila bikin em rê nadin madenê. Leşker tên gefan li gundiyan dixwin. Dibêjin ‘Em ê we bixin binçavan’. Lê çi dikin bila bikin em ji wan natirsin.”
‘Dixwazin gundiyan koçber bikin’
Paşê Hevşaredara Çinarê Semra Akyuz axivî û destnîşan kir ku heke şîrketa madenê li vir bicih bibe û her deverê talan bike dê şêniyên gund ji neçarî ji gund koç bikin û got: “Gel debara xwe bi sewalan dike, sewal jî bi giyayên dar û deveran têr dibin. Dema ku xwezaya li vir were talankirin tu wateya jiyana gundiyan jî namîne. Em ê li dijî talanê li gel xelkê xwe bin.”
