Amed – Hevserokê Şaxa OHDê ya Amedê Muhîttîn Mûgûç derheqê çûyîna Komîsyonê ya Îmraliyê de diyar kir ku divê êdî qanûn bên guhertin, qanûnên demokratîkbûnê bên amadekirin û got: “Çûyîna Komîsyonê ya Îmraliyê nîşan dide ku êdî muxatabê pêvajoyê birêz Abdullah Ocalan e.”
Komîsyona Demokrasî Xwîşk û Biratî û Hevgirtina Mîlî di roja 21ê Mijdarê de bi rojeva çûyina Girava Îmraliyê ya hevdîtina bi Rêberê Gelê Kurd Abdullah Ocalan, civiya û di civînê de biryara çûyîna Îmraliyê girtin. Di şandeya komîsyonê de Serokwekîla Koma DEM Partiyê Gulistan Kiliç Koçyîgît, Cîgirê Serokê Giştî yê MHPê Fetî Yildiz û ji AKPê Huseyîn Yayman cih digirin. Endamên komîsyonê di 24ê Mijdarê de çû Îmraliyê û Rêberê Gelê Kurd Abdullah Ocalan re hevdîtin kir. Hevserokê Şaxa OHDê ya Amedê Muhîttîn Mûgûç têkildarî hevdîtina Komîsyonê bi Rêberê Gelê Kurd Abdullah Ocalan re û mafê hêviyê ji Ajansa Welat re axivî.
‘Muxatab aliyekî dewlet be aliyên din jî birêz Abdullah Ocalan e’
Muhîttîn Mûgûç diyar kir ku komîsyon neçar ma û çû Îmraliyê û got: “Ev demeke dirêj bû ku nîqaş li ser çûyîna Îmraliyê hebû. Dawiyê hat gotin ku pêvajo yek alî nameşe. Ji ber vê yekê komîsyon çû Îmraliyê. Çûyîna Îmraliyê gelek girîng e. Ji ber ku dewleta Tirkiyeyê heta îro Tevgera Azadiyê bi awayekî fermî muxatab negirtibû. Çûyîna Îmraliyê nîşan dide ku di vê pêvajoyê de muxatab aliyekî dewlet be, aliyê din jî birêz Abdullah Ocalan e. Dewletê bi fermî birêz Abdullah Ocalan nas kir. Êdî divê meclis zagonan çêbikê ji ber ku karê Komîsyonê ne çêkirina zagona ye. Divê meclis zagonan çêbike. Komîsyonê hevdîtin pêk anî û paşê jî dê pêşniyaran bide meclisê.”
‘Dê Komîsyon rapor amade bike’
Muhîttîn Mûgûç anî ziman ku piştî hevdîtina Komîsyonê bi Rêberê Gelê Kurd Abdullah Ocalan re divê Komîsyon dest bi amadekariya qanûnên demokratîkbûyînê bike û wiha axivî: “Divê komîsyon raporê amade bike. Rapor jî bi ser mijarên axaftinên li Îmraliyê dê were amade kirin. Di raporê de ji bo çareserkirina pirsgirêka Kurd nexşerê were pêşniyarkirin. Çûyîna Îmraliyê tiştekî pîroz e. Ji ber ku her tişt ji bo rawestandina şer pêk tê. Kesên ku li dijî çûyîna Îmraliyê bertekan nîşan didin ji bo berjewendiya xwe tevdigerin. Em dizanin ku dema cihekî mirin hebê dilê gel jî hişk dibe. Ji bo dilê gel nerm bibe, divê nasnameya gelê Kurd û Tirk ji nû ve were pênasekirin. Divê êdî qanûnên entegrasyonê bên amadekirin.”
‘Divê mafê hêviyê pêk were’
Muhîttîn Mûgûç bi bîr xist ku di pêvajoyê de yek ji tiştê herî girîng mafê hêviyê ye û axafitina xwe wiha bi dawî kir: “Abdullah Ocalan di pêvajoyê de bi awayekî azad çawa tevbigerê? Mafê hêviyê bersiva vê ye. Kesekî di girtîgehê de di nava tecridê de dê çawa karibe ji bo aştiyê peywîrên xwe pêk bîne? Ji bo birêz Abdullah Ocalan rol û mîsyona xwe pêk bîne divê mafê hêviyê pêk were. Ku mafê hêviyê heke pêk bê, dê ev pêvajo zûtir bigihêje armanca xwe. Tê gotin ev pêvajo li gorî hiqûqê dimeşe, heke wisa be divê mafê hêviyê pêk were. Ji ber ku mafê hêviyê biryarekî hiqûqiye.”
