Amed – Leyla Zana ya li Çand Amedê lîstika şanoyê ya bi navê “Jîn” temaşe kir, destnîşan kir ku dîroka jinan dîroka vejînê ye û got: “Huner ruhê civakê zindî dihêle. Hişyarbûneke pir mezin çêbûye. Hewceye bi rêya hunerê ev hişyarbûn mayînde bibe.”
Şanoya Bajêr a Şaredariya Bajarê Mezin a Amedê li Navenda Çand û Kongreyê ya Çand Amedê lîstika şanoyê ya bi navê “Jîn” lîst. Lîstik ji aliyê jinan ve hate lîstin. Derhêneriya şanoyê Mizgîn Bîlmen, koreografiya wê Bêrîvan Savgat û dramaturgiya wê jî Berfîn Emektar dike. Di şanoyê de têkoşîna jinan a li dijî tundiyê bi zimanê laş tê vegotin. Berhem ji nameya Leyla Zana, helbestên Abdulla Peşêw û nivîsên Berfîn Emektar hatiye amadekirin. Siyasetmedara Kurd Leyla Zana, Seroka Daîreya Çand û Karûbarên Civakî Zeynep Yaş, endam û rêveberên saziyên sivîl ên civakî, partiyên siyasî û gelek kesan lîstik temaşe kirin. Beşdaran di dawiyê de bi çepikan keyfxweşiya xwe ya ji bo lîstîkê anîn ziman.
‘Jin nebe jiyan hemû tarî ye’
Leyla Zana ya ku lîstika şanoyê temaşe kir li vir axaftineke kurt kir. Leyla Zanayê spasiyên xwe pêşkeşî lîstikvanan kir û wiha got: “Yek yek bi yek dilê van hevalan maç dikim. Tenê dil dikare van gotinan bide hember. Gotin û kirinên wan ji dil bûn. Ne tenê 50 sal bi min dan jiyandin dîroka jinan a bi hezar salan bi min dan jiyandin. Dîroka jinan dîroka vejînê ye. Dîrok ji bo jinan ne tenê meş e. Ketin û rabûn e. Xerakirin û avahî ye. Gava ku jin hebe ronahî dibe ronahî. Jin nebe jiyan hemû tarî ye. Ez bi van ciwanan serbilind im her jineke Kurd welateke. Welat di dilê jina Kurd de dijî. Welat ne tene axa ku mirov li ser dimeşe ye. Welat her tiştê mirov e. Mejî ye, dil e, kirine, gotine. Dema tu li ser bijî divê tu heqê wê bidiyî. Ji ber ku ew ax hezkirinê dixwaze. Hesasiyetekê dixwaze. Ew ruh çawa di axê de heye di dilê jina Kurd de jî heye. Jina Kurd tim a çêkirinê bûye. Tenê welat naafirîne mêr jî jinûve bi xwe re diafirîne.”
‘Huner ruhê civakê zindî dihêle’
Leyla Zana destnîşan kir ku huner ruhê civakê zindî dihêle û wiha domand: “Hişyarbûneke pir mezin çêbûye. Hewceye bi rêya hunerê ev hişyarbûn mayînde bibe. Bibe nasnameyeke nûjen.”
Piştî axaftina Leyla Zanayê beşdaran li çepikan dan.
