Di 13ê Mijdar 1960an de li Salona Sînemaya “Şehrezad” a li bajarê Amûdê, di bin navê destekdayîna şoreşa Cezayîrê ku li dijî mêtingeriya Fransayê liber xwe dida de, fîlmek hat pêşandan.
Di 13ê Mijdar 1960an de li Salona Sînemaya “Şehrezad” a li bajarê Amûdê 500 şagirtên dibistanên seretayî ku temenên wan kêmtirî 12 salan bûn, li hatibûn komkirin. Lê salonê têrî hejmareke wiha zêde nedikir. Dîwarên wê ji heriyê, bane wê texte û qamiş bû.
Salona ku qaşo ji bo destekdayînê hatibû tijekirin, wê rojê bû dojeh. Dema filmê destpêkir, ji nişka ve şewat derket û zarok hemû di hundir de man. Zarok li ber derî kom bûn ku derkevin lê ji ber hejmara zêde derketin zehmet bû. Şêniyên bajêr berê xwe dan cîhê şewatê ku zarokên xwe xelas bikin. Yek kesê yekem ket hundirê salonê û xwest zarokan xilas bike jî Mihemed Seîd Axayê Deqorî bû. Di nava şewata dijwar de, Mihemed Seîd gelek zarok xilas kirin, lê ew bixwe, di bin banê sînemayê yê ku hilweşiya de ma û jiyana xwe ji dest da.
Ekîbên agirkujiyê yên hikûmetê bi hawarê nehatibûn. Heta ku şewat vemirî, 283 zarokan jiyana xwe ji dest da. Li beramberî vê komkujiyê, desthilata wê demê ku Komara Erebî ya Yekgirtî (Sûriye û Misir) bû, tu lêpirsîn nekir û heta niha jî tu encam derneket.
Li şûna sînemayê niha abîdeya qurbaniyan hatiye çêkirin.
Bi pêvajoya şoreşa 19yê Tîrmehê (2012) re jî ji bo zindîhiştina bîranîna qurbaniyan li qada sînameyê gavên girîng hatin avêtin. Ji sala 2016an ve jî Mîhrîcana Fîlman a Navnetewî ya Rojava tê organîzekirin û xeyalên zarokên qurbaniyên şewatê tê jiyanîkirin.
‘Çîrokên hevbeş, sînemaya azad’
Mîhrîcana ku her sal di roja komkujiyê de (13 Mijdar) tê lidarxistin, hefteyekê berdewam dike. Mîhrîcan ji ber sedemên cuda ji sala 2022yan ve nehatibû lidarxistin lewma îsal (2025) ya 5emîn tê lidarxsitin. Dirûşmeya mîhrîcana ku li bajarê Qamişlo tê lidarxistin, weke “Çîrokên hevbeş, sînemaya azad” hatiye diyarkirin. Ji bo mîhrîcanê ji Kurdistan û welatên cuda 218 fîlman û 22 senaryoyan serlêdan kirine. Ji 218 fîlman 81 fîlm hatine erêkirin. Di mîhrîcamê de wê di beşên film û senaryoyê de xelat werin dayîn. Her wiha dê panel û semîner werin lidarxistin.
