Li gorî rapora pêvek a ATKê ya derbarê Rojîn Kabaîşê de teqez bû ku 2 DNAyên li ser bedena wê hatine tespîtkirin neperîne. Hat zanîn ku ji vir şûnde dê dozgerî têkildarî kesên gumanbar nirxandina xwe bike û DNAyan bide ber hev.
Mirina bi guman a xwendekara Zanîngeha Yuzuncu Yilê ya Wanê Rojîn Kabaîşê heta niha jî nehatiye ronîkirin. Pirsên têkildarî DNAyên du zilaman ên di rapora Saziya Tipa Edlî (ATK) de hatibûn tespîtkirin hê jî nehatine bersivandin. Hat zanîn ku rapora pêvek a baroyên Amed û Wanê, parêzerên malbata Rojîn Kabaîşê û Wezareta Dadê ji ATKê xwestibû jî li dosyeyê hate zêdekirin.
Li gorî nûçeya nûçegihanê Ajansa Mezopotamyayê Adnan Bîlen, rapora pêvek çendek dem berê hatibû şandin û di raporê de teqez bû ku 2 DNAyên ser bedena Rojîn Kabaîşê hatine tespîtkirin neperîne.
Teqez bû ku DNA neperîne
ATK’ê di rapora xwe ya beriya niha de digot ku îxtîmala perînê heye lêbelê di rapora nû de destnîşan kir ku DNAyên kesên tev li otopsiyê bûne, di dema dîtina cenazeyê de li wir bûn, di dema birina cenazeyê de cih digirtin û kesên Rojîn Kabaîş têkiliya wê pê re çêbûye (hevalên wê yên zanîngeh û hevalên wê yên din) jî di nav de bi giştî yên 134 kesan hatine girtin. ATKê, da zanîn ku ev mînak dane ber hev û derket holê ku tu yek ji wan DNAyan û yên li ser bedena Rojîn Kabaîşê hatine dîtin hev negirtine. Bi vê yekê re teqez bû ku 2 DNAyên li ser bedena Rojîn Kabaîşê hatine dîtin neperîne.
Êdî dê nirxandin li ser gumanbar bê kirin
Hat zanîn ku piştî raporê, dozgerî dê nirxandina xwe li gorî kesên gumanan jê dibe ve bike û DNAyan bide ber hev. Mijara herî zêde cihê fikarê ew e ku dosye were vehêlandin. Hiqûqnas dibêjin ku ji bo ronîkirina dosyeyê dibe ku yek ji doneyên herî girîng, agahiyên di telefona Rojînê de bin.
