Nizamettîn Kabaîş û parêzerên dosyaya Rojîn Kabaîş li Wanê bi rojnameger û siyasetmedar re civiyan û dan zanîn ku li gorî rapora pisporan wesayîtek û di wesayîtê de çend kes hatine tespîtkirin û gotin: “Wê berfirehiya raporê di rojên pêş de ji raya giştî re bên parvekirin.”
Bavê Rojîn Kabaîş Nizamettîn Kabaîş û parêzerên dosyayê Şahîn Canguleç û Abdurrahman Karabûlût têkildarî qonaxa ku dosya gihiştiyê li oteleke Wanê bi partiyên siyasî û rojnamegeran re civÎnek li dar xistin. Hevserok û rêveberên Partiya Herêmên Demokratîk (DBP) û DEM Partiyê, nûnerên partiyên siyasî û gelek rojnameger tev li civînê bûn.
‘Rektor li cem me nesekinî’
Di civînê de ewilî bav Nîzamettîn Kabaîş axivî û da zanîn ku ew dixwaze berisva pirsa “Kê Rojîn kuştiye?” bibîhize. Nîzamettîn Kabaîş bal kişand ser helwesta rektorê Zanîngeha Yuzuncu Yilê û got: “Rektor ne dijminê min e, lê diviya ji roja yekê ve li kêleka me bûya û vê bûyerê lêkolîn bikira. Lê ew çi dike? Astengiyê ji rojnamegeran re derdixîne û pêşî li nûçeyan digire.”
‘Wesayîtek û di wesayîtê de çend kes hatine tespîtkirin’
Ji parêzerên dosyayê Şahîn Canguleç jî diyar kir ku ew dixwazin lêpirsînê pêş ve bibin û got: “Hin agahiyên ku di vê pêvajoya dawî de di raya giştî de hatine parvekirin, berê jî di raporên ku ji aliyê Baroya Amedê ve hatibûn weşandin de cih girtine. Wan nêzîkî saetek beriya civînê rapora pisporan wergirtine û got ku ev rapor dê di pêvajoya pêş de bi raya giştî re bê parvekirin. Di raporê hatiye destnîşankirin ku wesayîtek û di wesayîtê de çend kes hatine tespîtkirin. Her wiha cîhê ku herî dawî sînyal ji telefona Rojîn hatiye hilgirtin jî hatiye tespîtkirin. Wê di rojên de agahiyên berfireh bên parvekirin.”
Civîn, piştî bersivandina pirsên rojnamevanan, bi dawî bû.
