Amed – Hemwelatiyên Amedê derheqê zêdekirina kirêya xaniyan de bi gilî û gazinc in û gotin ku heqê kirêya xaniyan pişta wan şikandiye.
Daneyên Saziya Îstatîstîkê ya Tirkiyeyê (TUÎK) û rastiya di nav civakê de hev nagire. Bi taybetî li Amedê bihakirin ango zêdekirina kirêya xaniyan hema bêje her meh diguhere. Bihakirina kirêyan bêserûber e. Xwediyên xaniyan li gorî xwe kirêyan zêde dikin. Li Amedê her kesên ku di xaniyên kirê de rûdinê ji ber bihayê kirêyê bi gilî û gazinc e û nerazî ne.
Her wiha ne tenê li Amedê li bajarên bakurê Kurdistan û Tirkiyeyê hemû bihabûna kirêya xaniyan heye. Roj bi roj xelk feqîr dibe û heqê kirêya xaniyan û pirsgirêken aboriyê wan tengav dikin. Hatiye wê astê ku hema bêje welatî êdî nikarin debara xwe bikin.
Me jî li kuçe û kolanên Amedê ji welatiyan derheqê bihakirina kirêya xaniyan de pirsî. Me pirsa, “Gelo xelkê Amedê ji bo bihabûna kirêya xaniyan çi difikire û pirsgirêkên aboriyê de çi difikire?” ji hemwelatiyên Amedê pirsî. Welatiyan pirsa me nirxandin û derbarê vê yekê de gilî û gazin û nêrînên xwe anîn ziman.
Hemwelatiyan da zanîn ku kirêya xaniyan her ku diçe zêde dibe û ev yek jî rê li ber pirsgirêkên aboriyê vedike û heqê kirêya xaniyan pişta wan şikandiye. Hemwelatiyan diyar kir ku ew hatine wê astê êdî nikarin heqê kirêya xwe bidin û hemû pere û meaşê werdigirin jî ji heqê kirêyê re diçe. Hemwelatiyan xwest pirsgirêka aboriyê tavilê bê çareserkirin û ev pergal bê guhertin.
