Platforma Saziyên Demokratîk têkildarî êrişa komeke kesên selefî ya li dijî sê jinan daxuyanî da. Kesên li ser navê platformê axivîn diyar kirin ku bêexlaqiya hatiye kirin şermezar dikin û destnîşan kirin ku tarzê ku jiyana mirovan hedef digire nayê qebûlkirin.
Di şeva 1ê Mijdarê de li navçeya Sûrê ya Amedê, komeke ji nêzî 20 kesên selefî ango olperest pêk dihatin êrişî mala ku sê jin lê dimînin kirin. Ev koma selefîst çûne mala her sê jinan û gef li wan xwarine. Platforma Saziyên Demokratîk têkildarî bûyerê li ber Mizgefta Nebî ya li navçeya Sûrê ya Amedê daxuyanî da çapemeniyê. Hevşaredar û pêkhateyên platformê di nav de gelek kes tev li daxuyaniyê bûn. Girseyê dirûşmên “Jin jiyan azadî” , “Bijî berxwedana jinan” û “Bêjin jiyan nabe” berz kir.
‘Bila kes notirvaniya exlaqê neke’
Di daxuyaniyê de ewilî Hevseroka Partiya Wekhevî û Demokrasiyê ya Gelan (DEM Partî) ya Amedê Gulşen Ozer axivî. Gulşen Ozer da zanîn ku êrişa li dijî jinan beriya sê rojan li Taxa Dabanoglû ya navçeya Sûrê pêk hatiye û wiha got: “Hinek kesên ku bi mejiyê DAIŞê tevdigerin hevalên jin derb kirin. Hafizaya Sûrê xurt e bi salan e bi dehan şaristanî û milet bi hev re dijîn lê kes tev li jiyana kesê nabin. Lê niha 10-15 mêr êrişî sê jinan dikin ev di kîjan ol û bîrdoziyê de heye? Tu mirov nikarin tev li jiyana yeke/î din bibin. Her mirovekî maf heye ku li welatê lê dijî bi awayekî azad bijî. Bila kes notirvaniya exlaqê neke bila kes welatê paqij qirêj neke. Bila mejiyê xwe yê qirêj paqij bikin. Em weke TJA vê zilmê û vê exlaqê qirêj qebûl nakin. Kesên dixwazin bila xwe paqij bikin. Em ji wan bêtir oldar in ol ola me ye jî. Bila vî exlaq û mejiyê qirêj di nava vî bajarî de nexin dewrê.”
Gulşen Ozer destnîşan kir ku kes nikare nava Sûrê bêexlaqiyê bike û wiha domand: “Ew destê dirêjî jinê dibe bila bişikê ew çavên bi awayekî nebaş li jinê dinêrin bila birijin. Em weke TJA vê zilmê qebûl nakin, şermezar dikin û em ê li dijî vê yekê têbikoşin.”
‘Tarzê ku jiyana mirovan hedef digire nayê qebûlkirin’
Dûre Hevseroka Partiya Herêmên Demokratîk (DBP) a Amedê Rûçem Elyakût jî daxuyaniya bi Tirkî xwend. Rûçem Elyakût diyar kir ku di van rojên avakirina civaka demokratîk tê nîqaşkirin de tu nêzîkatiyên ku tarzê jiyana mirovan, bawerî û nasnameya wan, azadî û mafê wan hedef digire nayê qebûlkirin. Rûçem Elyakût diyar kir ku di serî de tundiya li dijî jinê dê li hemberî her cure nêzîkatiyên tundiya civakî diafirînin bi awayekî çalak têbikoşin û got: “Em ê çanda jiyana bihevre ku bi sedsalan e didome bidomînin û biparêzin. Em ê destûrê nedin nêzîkatiyên asîmîleperez ku cudahiyan weke sedemê cihekariyê dibînin.”
