Amed – Serokê Baroya Amedê Abdulkadîr Guleç diyar kir ku gavên gerîlayên Tevgera Azadiyê ya Kurd avêtine dîrokî ne û got: “PKKê gelek gav avêtin divê ji niha şûnde dewlet bersiv bide van gavan û qanûnên nû çêbike.”
Rêveberiya Tevgera Azadiyê ya Kurdistanê di çarçoveya biryarên 12emîn Kongreya Partiya Karkerên Kurdistanê (PKK) de di 26ê Cotmehê de li Qendîlê daxuyaniyek da û diyar kir ku ji Tirkiyeyê dest bi vekişîna hêzên xwe kiriye. Piştî daxuyaniya Tevgera Azadiya Kurdistanê geşedanên girîng dest pê kir. Serokê Baroya Amedê Abdulkadîr Guleç têkildarî biryara Tevgera Azadiyê ya Kurdistanê ji Ajansa Welat (AW) re axivî.
‘Bila zemîna hiqûqî bê avakirin’
Abdulkadîr Guleç diyar kir ku di rojên dîrokî re derbas dibin û wiha got: “PKKê daxuyanî da û diyar kir ku ew ji Tirkiyeyê vekişiyane. Pêvajo di 1ê Cotmeha 2024an de dest pê kiribû. Gava vekişandinê pêvajo anî qonaxeke nû. Di 27ê Sibatê de birêz Abdullah Ocalan ji bo aştî û civaka demokratîk bangawazî kir. PKKê jî xwe fesix kir û di 11ê Tirmehê de çekên xwe şewitandin. Paşê li Meclisê komîsyon hat avakirin ew jî gaveke girîng bû lê gava herî girîng vekişindina PKKê bû. Ew gav hem ji bo aştiyê hem jî ji bo civakeke demokratîk pêk hat. Ev jî divê destê desthilatê xurt bike. Lê tenê ev gav ne bes e. Kesên ku çekên xwe şewitandine dê di pêşerojê de rewşa wan çawa bibe, ew ê çawa tev li siyaseta demokratîk bibin, qanûnên çawa dê werin derxistin? Hewceye ji niha şûnde desthilat, dewlet bersiva van pirsan bide. Bila zemîna hiqûqî bê avakirin. Lê hê jî tu gav nehatiye avêtin. Qanûnên nû dê pevajoyê xurt bike.”
‘Bila qanûna teror û înfazê bê rakirin û zagonên nû werin derxistin’
Abdulkadîr Guleç anî ziman ku hewcehî bi gav û qanûnên taybet heye û ev tişt anî ziman: “Kesên ku çêk berdane divê der heqê wan de doz neyê vekirin. Ji bona vê jî hewcedarî bi zagonên nû heye. Bi hezaran kes îro di girtîgehan de ne û derveyî welat dijîn. Ew kes bi pirsgirêka Kurd re rû bi rû man û paşê jî derketin derveyî welat. Ji bona wan jî divê zagonên nû werin derxistin. Em jî wekî Baroya Amedê dixwazin ku ‘qanûna teror û înfazê’ bê rakirin. Ev 9 meh in, ji aliyê PKKê ve gelek gav hatin avêtin, divê bersiva vê jî desthilat, meclis û dewlet bide.”
‘Bi gotin û siyaseta berê pêvajo nameşe’
Abdulkadîr Guleç destnîşan kir ku bi gotina “teslimbûyîn” pêvajo nameşê û axaftina xwe wiha dawî kir: “Ev 41 sal in bangawaziya teslimbûyînê tê kirin. Lê vê bangê tu encam negirt. Ji xwe kesên vekişiyanê jî banga teslîmbûyînê qebûl nakin. Ev ne tişteke rast e. Heke pêvajo heye, ji gel û vî welatî re aştî pêwîst e bi gotin û siyaseta berê pêvajo nameşe. Bi înkarê û politîkayên ewlehiyê nameşe. Divê rayêdarên devletê dest ji van gotinan berdin. Çapemenî jî bi zimanekî baş xizmeta aştiyê bike.”
