Amed – Endamên Koma Ziman û Wêjeya Kurdî ya Zanîngeha Dîcleyê (DUKET) diyar kirin ku ji bo zimanê Kurdî winda nebe ew xebatan dimeşînin û gotin: “Divê her kes xwedî li zimanê Kurdî derkeve û em jî dê kursên zimanê Kurdî vekin.”
Li Zanîngeha Dîcleyê ya li Amedê sala perwerde û hîndekariyê ya sala nû dest pê kir. Xwendekarên zanîngehê ji bo qlûb û komên xwe bidîn nasîn “Rojên Danasînê” li dar dixin. Rojên danasînê li nava zanîngehê pêk tên û bi dehan qlûp û koman standên xwe vekirine. Yek ji wan koman Koma Ziman û Wêjeya Kurdî ya Zanîngeha Dîcleyê (DUKET) ye. Endamên DUKETê bi cil û bergên xwe yên Kurdî xwendekaran pêşwazî dikin û agahiyên koma xwe parve dikin. Endamên komê têkildarî koma xwe û daxwazên xwe yên li ser zimanê Kurdî ji Ajansa Welat (AW) re axivîn.
‘Em ê dersên Kirmanckî û Kurmancî bidin’
Endama DUKETê Arjîn Ceylan diyar kir ku qlûba DUKETê ji bo zimanê Kurdî hatiye avakirin û got: “Ji bo zimanê zikmakî winda nebe, ji bo nasnameya me tune nebe me ev kom avakir. Ji bo zimanê Kurdî di nav ciwanan de belav bibe em ê çalakiyan li dar bixin. Her roja diçe axaftina bi zimanê Kurdî kêm dibe. Em dixwazin zimanê Kurdî di nav civakê de belav bibe û were axaftin. Em dixwazin li welatê xwe bi zimanê xwe biaxivin. Em ê qûrsan vekin û li wir dersên zimanê Kirmanckî û Kurmancî bidin. Em ê çalakiyên çandî li dar bixin û şanoya Kurdî bilîzin. Daxwaza me ew e ku ciwan tev li koma me bibin û xwedî li zimanê xwe derkevin. Çalakiyên me jî ji bo na vê ne. Em dixwazin qedexeyên li ser zimanê Kurdî rabin û bi zimanê Kurdî ders bigirin.”
‘Em wekî xwendekar û DUKET perwerdehiya bi Kurdî dixwazin’
Rêveberê DUKETê Beşîr Tekîn jî destnîşan kir ku ji bo danasîna koma xwe tev li rojên danasîna Zanîngeha Dîcleyê dibin û ev tişt anî ziman: “Me DUKET di sala 2023yan de avakir. Me xwest ku çanda me ya dewlemend tev li van rojan bibe. Xwendekar tên li standa me û daxwaza qursên zimanê Kurdî dikin. Em jî ji bo bibin bersiv em ê qursên zimanê Kurdî vekin. Em wekî xwendekar û Koma DUKETê perwerdehiya bi Kurdî dixwazin. Ji bo zimanê Kurdî winda nebê tişta herî girîng perwerdehiya bi zimanê Kurdî ye. Divê gelê Kurd jî tev li vê xwestekê bibe, ev bar li ser mile tevahiyê gelê me ye.”
