Jinên ku li navçeya Silopiyayê ya Şirnexê ji bo aqûbeta mirina Rojîn Kabaîşê bê zelalkirin daxuyanî da û wiha gotin: “Îro derketiye holê ku DNAya 2 kesan li ser laşê Rojînê hatiye dîtin. Ev jî tê wê wateyê ku rayedar hin tiştan vedişêrin.”
Jinan li Kolana Hunerê ya navçeya Silopiyayê ya Şirnexê ji bo Xwendekara Zanîngeha Yuzuncu Yilê ya Wanê Rojîn Kabaîşê ya ku di 27ê îlona 2024an de winda bibû û cenazeyê wê piştî 18 rojan hatibû dîtin daxuyanî da çapemeniyê. Parlementera DEM Partiyê ya Şirnexê Newroz Ûysal Aslan, endamên partiyên siyasî û saziyên civakî, endamên Tevgera Jinên Azad (TJA) û Meclîsa Dayîkên Aştiyê tev li daxuyaniyê bûn. Di daxuyaniyê de pankarta li ser, “Kujer diyar in, edalet li ku ye” dinivîsî hat vekirin. Berdevka TJAyê ya Şirnexê Nafiye Geçgelê daxuyanî xwend û anî ziman ku ev saleke ew dipirsin ku çi bi serê Rojîn Kabaîşê hat.
‘Li hember qêrîna me dozgerî bêdeng ma’
Geçgelê bertek nîşanî rayedarên dewletê da û wiha domand: “Li hember qêrîna me ya ji bo Rojînê dozgerî bêdeng dima. Lêkolîn li ser mirina wê nekirin û dereng hîştin. Îro derketiye holê ku DNAya 2 kesan li ser laşê Rojînê hatiye dîtin. Ev jî tê wê wateyê ku rayedar hin tiştan vedişêrin.”
‘ATKê û Dozgeriya Wanê mirina Rojînê di tarîtiyê de hiştin
Piştî Geçgelê Parlementer Newroz Ûysal Aslanê jî bi bîr xist ku rayedaran destpêkê digotin Rojînê întîxar kiriye û wiha got: “Ev saleke Saziya Tiba Edlî (ATK) ya Wanê û Dozgeriya Wanê rastiya mirina Rojînê di taritiyê de hiştin. Aqilê ku li hember jinên Kurd tundiyê pêk tîne îro li Wanê li ser kar e. Ev şopên li ser bedena Rojînê derketine yên kê ne? Divê were aşkerekirin. Heya ku aqubeta mirina Rojînê zelal nebe û kujer hesabê nedin em ê li ser piyan bin. Em ê tekoşîna xwe berdewam bikin.”
