KCKê bi boneya salvegera êrişa bombeyî ya 10ê Cotmeha 2015an a li Îstasyona Trenê ya Enqereyê hatiye pêkanîn daxuyanî da û got: “Pêvajoya Aştî û Civaka Demokratîk, pêvajoya pêkanîna hêviyên şehîdên 10ê Cotmehê ye.”
Hevserokatiya Konseya Rêveber a KCKê bi boneya 10. salvegera êrişa bombeyî ya li dijî Mitînga Ked, Aştî û Demokrasiyê ku di 10ê Cotmeha 2015an de li pêşiya Îstasyona Trenê ya Enqereyê hate lidarxistin, daxuyaniyeke nivîskî weşand.
KCKê di daxuyaniya xwe de destnîşan kir ku di komkujiyê de zêdetirî 100 kesan jiyana xwe ji dest daye û gelek kes birîndar bûne, yek ji bûyerên herî tarî ye ku di bin çavdêriya dewletê de hatiye kirin e û wiha got: “Di 10emîn salvegera vê komkujiya hovane de, ku xwişk-biratiya gelan û îdeala jiyaneke demokratîk û hevpar hedef girt, em careke din bi tundî şermezar dikin û kesên ku jiyana xwe ji dest dane bi rêzdarî bi bîr tînin. Îdeala wan a xwişk û biratiya gelan, aştî, azadî û jiyana demokratîk di têkoşîna gelê me de dijî û rêwîtiya xwe ya ber bi serkeftinê e didomîne. Em dubare dikin ku hesreta gelan ji bo aştî, azadî û xwîşk û biratiyê bi komkujiyên xwînî nayê vemirandin. Li Tirkiyeyeke demokratîkbûyî, îdeala wekhev, azad û jiyana hevbeş ji bo Tirk, Kurd û hemû gelan dê neyê astengkirin. Ew kesên ku stranên aştî û biratiyê gotin, govend û horon ji bo jiyana wekhev û azad a hemû gelan reqs kirin, ji destpêkê ve ev hêzan têk birin. Bêguman xeyalên wan dê pêk werin.”
‘Êriş ne bi tasadufî hatin kirin’
Di berdewama daxuyaniyê de KCKê da zanîn ku beriya hilbijartina 7ê Hezîranê û 1ê Mijdarê de pêkanîna gelek komkujiyan ne bi tesadufî bû û wiha pê de çû: “Di pêvajoya ku êrîşên wiha dihat kirin de kedkar, jin û gelek rêxistinên civaka demokratîk ji bo aştî û pêşî girtina şer ev çalakiya dîrokî pêk anîn. Ev çalakî wê her tim di têkoşîna demokrasî û azadiyê ya li Tirkiyeyê de were bîranîn. Piştî van êrîşan li Tirkiyeyê gav bi gav hemû qadên demokratîk hatine tengkirin, azadî hate sînordarkirin. Li Tirkiyeyê di serî de li dijî hêzên demokrasî û gelê Kurd, ev 10 sal in şerê qirêj û taybet didome û encama pêvajoyeke wiha pêk hat.”
‘Pêvajo pêkanîna xeyalên şehîdan e’
KCKê di dirêjiya daxuyaniya xwe de da diyar kir ku êrişên 10 salan gelê Kurd û hêzên demokratîk nedan tirsîn û wiha pê de çû: “Berovajî vê, van polîtîkayan Tirkiyeyê gihand rewşek bêçare ya siyasî, civakî, aborî û dîplomatîk. Gelê me di van deh salan de bedelên giran da, lê têkoşîna ji bo demokrasî, azadî û aştiyê, hestên şehîdên 10ê Cotmehê, terk nekir. Di encama vê têkoşînê de, pêvajoya Aştî û Civaka Demokratîk ji hêla Rêber Apo ve hat destpêkirin. Armanca pêvajoya Aştî û Civaka Demokratîk, berî her tiştî, pêkanîna hêviyên şehîdên komkujiya 10ê Cotmehê ye. Dema ku ev pêvajo bi ser bikeve, bedelên giran ên ku bi jiyana wan hatine dayîn dê hîn girîngtir bibin.”
‘Em ê xeyalên wan pêk bînin’
Di dawiya daxuyaniya xwe de KCKê anî ziman ku divê tavahiya gel û dostên wan ji bo serkeftina pêvajoya Aştî û Civaka Demokratîk bi ser bikeve divê têbikoşe û wiha derbirî: “Ev dê bersiva herî guncav be ku em bidin kesên ku di komkujiyan de jiyana xwe ji dest dane. Bi vê têgihîştin û baweriyê, em careke din bi rêzdarî kesên ku di Komkujiya Îstasyona Trenê de jiyana xwe ji dest dane bi bîr tînin û soz didin ku em ê bîranîna wan di têkoşîna xwe de zindî bihêlin û xeyalên wan pêk bînin.”
