HSDê ragihand ku “Komên hikûmeta demkî hewl didin bi tank û panzeran derbasî taxên Şêxmeqsûd û Eşrefiyê bibin, bi hawin û dronan êrîşî her du taxan dikin.
Navenda Ragihandina Hêzên Sûriya Demokratîk (HSD) li ser malpera xwe der barê bûyerên li taxên Şêxmeqsûd û Eşrefiyê yên Helebê diqewimin û îdiayên dibêjin hêzên wan li wir in, daxuyaniyek da.
Di daxuyaniya HSDê wiha hate gotin: “Bûyerên li Helebê diqewimin, provokasyonên komên hikûmeta demkî û hewlên wan ên derbasbûna bi tankan e.
Îdiayên hin medyayan ên ku HSDê bendên kontrolê yên çekdarên hikumeta Şamê li derdora taxên Eşrefiyê û Şêxmeqsûdê yên bajarê Helebê hedef digirin, derew in.
Em diyar dikin ku ev îdia ne rast in. Ji dema vekişînê ya li gorî rêkeftina 1ê Nîsanê ve, hêzên me li wê herêmê tune ne.
Komên hikumeta Şamê êrîşî sivîlên li taxên Eşrefiyê û Şêxmeqsûdê dikin. Komên hikumet ambargoyeke giran daniye, alîkar û madeyên tibî qut kiriye, gelek welatî revandine û rojane li dijî şêniyan li ser bendên kontrolê û derdora her du taxan tehrîkê dikin. Di vê dawiyê de jî komên axê li derdora her du taxan danîn û ambargo daniye.
Bi rageşiyeke xeternak, ew kom hewl didin bi tank û panzeran derbasî her du taxan bibin, bi hawin û dronan êrîş dikin. Di encamê de sivîl bûn qurban û zirarên madî bi mal û milkên welatiyan bûn.
Van binpêkirinan hişt ku şênî nerazîbûna xwe nîşan bidin û parastina xwe li kêlek Hêzên Ewlekariya Hundirîn ên her du taxan bikin.
Hikûmeta Şamê berpirsa ambargoyê û binpêkirinên li dijî sivîlan û rageşiya xeternak a dawî ye. Ev rageşî zehmetiyên şêniyan zêde dike û gefan li îstîqrara herêmê dixwin, li kêlek wê jî rêzê ji jiyana welatiyan û rûmeta wan re nagire. ”
