Enqere – Serokkomarê AKPî Recep Tayyîp Erdogan ku di vêkirina sala nû ya qanûndanînê ya Meclise de axivî û têkildarî xebatên ‘pêvajoyê’ spasiya DEM Partiyê kir û got: “Em yekitiya Suriyeyê diparêzin û li dijî parçebûna Suriyeyê ne. Ji bo li dervayî sînorên me hezeke terore çênebe, em di pêvajoyeke gotûbêjê de ne.”
Sala nû ya Qanûndanînê ya 4emîn a Serdema 28emîn a Meclisê dest pê kir. Derveyî CHP û Partiya Karkeran a Tirkiyeyê (TÎP) partiyên din tev li rûniştina taybet a Meclisê bûn. Axaftina destpêkê ya vekirinê Serokê Meclise Nûman Kurtulmuş kir û bal kişand ser xebatên Komîsyona Demokrasî, Xwişk-Biratî û Hevgirtina Mîllî û got: “Ev fersendeke dîrokî ye. Bi xebatên fedakar ên Komîsyonê em ê bigihijin encamekê û xwişk-biratiya Kurd û Tirkan mîsoger bikin.”
‘Pêşniyar dê bikevin meriteyê’
Piştre Serokkomarê AKPî Erdogan hat li Meclise. Pê re sirûda netewî ya Tirkiyeyê hat xwendin. Piştî xwendina sirûdê Serokkomarê AKPî Recep Tayîp Erdogan axivî. Erdogan bal kişand ser pêvajoya sala par ya bi piştgiriya Serokê MHPê Devlet Bahçelî dest pê kiriye û wiha got: “Ez ji serokê MHPê re ji bo wê bangê spas dikim. Her wiha ji bo kêd û xebatên pêvajoyê ji DEM Partiyê re spas dikim. Ez bi vesileyê, Parlamenterê Stenbolê birêz Sirri Sureyya Onder bi rêzdarî bi bîr tînim. Teror edî hatiyê asta qedandinê. Pêvajo pir bi hesas e. Em vir careke din dibêjin; Dewleta Tirkiyeyê li gel tu hezekê nakeve bazariye. Armanca me qedandina terorê û bi hezkirina xwişk-biratiyê ye. Di bin banê Meclisê de Komîsyonek hatiyê avakirin. Heta niha jî 12 civîn pêk anîne. Bêguman piştî bi dawîbûna xebata komîsyonê dê di destê me de daneyên xurt hebin. Pêşniyarên di komîsyonê de hatinê kirin piştî li hevkirinê dê bikevin meriyetê.”
‘Tirkiye destûr nade Suriye parçe bibe’
Tayîp Erdogan li ser mijara Suriyeyê jî destnîşan kir ku ew ê rê nadin Suriye parçe bibe û wiha dirêjî da axaftina xwe: “Tirkiye dê vê pêvajoya ewlehî û aramiyê biparêze. Tirkiye bi qasî ku welatê Kurdên di nava Tirkiyeyê de ye ewqas jî welatê Kurdên li dervayî Tirkiyeyê ne. Sed sal berê jî wisa bû, niha jî wisa ye. Em yekitiya Suriyeyê diparêzin û li dijî parçebûna Suriyeyê ne. Ji bo li dervayî sînorên me hezeke terore nebe em di pêvajoyeke gotobêjê de ne. Lê heke ew pêvajoya gotobê encam negre, tişta ku Tirkiye bike jî diyar e. Tirkiye destur nade. Biratiya Kurd, Tirk û Ereban dikarê hemû lîstikan vala derxe, pirsgirêkên herême çareser bike û aştiyeke mayîndê pêk bîne.”
Erdogan piştî axaftina xwe temam kir tevî koma parlamenterên DEM Partiyê, komên partiyên din ên li Meclisê geriya destê parlamenteran girt û ji hevserokên giştî û serokên partiyan li Meclisê re serkêftin xwest.
Piştî rûniştinê di mazûvaniya Nûman Kurtulmuş de dê êvarê resepsiyon were lidarxistin. Hat zanîn ku dê DEM Partî jî tev li resepsiyonê bibe.
