Serokê Baroya Amedê Abdulkadîr Guleç diyar kir ku mafê girtiyan yên herî bingehîn tên pinpêkirin, weşanên Kurdî nadin girtiyan û girtî nikarin weşanên Kurdî bixwînin di vî aliyî de qedexe heye.
Baroya Amedê, Komeleya Hiqûqnasên ji bo Azadiyê (OHD) a Şaxa Amedê û Komeleya Alîkariya Malbatên Girtî û Hikumxwaran ((TUHAY-DER) a Amedê rapora binpêkirina mafan a girtîgehên Amed, Erzîngan, Xarpêt û Erziromê bi raya giştî re parve kirin. Ji bo parvekirina raporê li avahiya Baroya Amedê civîna çapemeniyê hate lidarxistin. Rapora ku bi Tirkî hatibû amadekirin ji aliyê endama Komîsyona Şopandina Girtîgehan a Baroya Amedê parêzer Rihan Gok ve hate xwendin. Nebûna rapora bi Kurdî bala rojnamegeran kişand ser xwe.
‘Weşanên Kurdî nadin girtiyan’
Piştî xwendina raporê Serokê Baroya Amedê Abdulkadîr Guleç di derheqê pinpêkirinên mafên mirovan ên li girtîgehan de ji ajansa me re axivî û diyar kir ku mafê girtiyan yên herî bingehîn tên binpêkirin û wiha got: “Weşanên Kurdî nadin girtiyan. Girtî nikarin weşanên Kurdî bixwînin di vî aliyî de qedexe heye. Di raporê de jî hebû, nameyên ku ji birêz Abdullah Ocalan re tên şandin nayên şandin. Dîsa li girtîgehan polîtîkayên zayendperest tên meşandin. Gelek girtiyên ku nexweşiyên wan yên giran hene lê nayên berdan, mafê wan yên tedawiyê tên binpêkirin.”
‘Binpêkirinên mafan di nav civakê de bêhêvîbûnê pêş dixe’
Abdulkadîr Guleç da zanîn ku di vê pêvajoyê de ev pêkanînên binpêkirina mafan baweriya civakê li hemberî pêvajoyê kêm dike û ev yek anîn ziman: “Binpêkirinên mafên mirovan û mafên girtiyan di nav civakê de bêhêvibûnê pêş dixe. Em dibêjin gere êdî ev pinpêkirinên mafan ji holê bên rakirin. Bi biryarên Lîjneyên Îdare û Çavdêriyê yên Girtîgehan înfaza girtiyan tê şewitandin, berdana wan tê astengkirin. Ev biryar ne biryarên hiqûqî ne. Di van lîjneyan de kesên hiqûqnas tune ne. Li gorî daneyên Komeleya Mafê Mirovan di girtîgehan de hezar û 600 girtiyên nexweş hene, ji van 600 kes nexweşiyên wan giran in. Divê di vê pêvajoyê de ev girtiyên nexweş hemû bên berdan.”
