Enqere – Însiyatîfa ji bo Roboskiyê Edalet, di hefteya 165an de ji bo Roboskiyê û hemû komkujiyên pêk hatinê edalet xwest. Avakarê Însiyatîfe Tanju Gunduzalp bi lêv kir ku divê ‘komîsyona heqîqetê’ ava bibe û dewlet bi sûcên xwe re hevrû bibe.
Însiyatîfa Ji bo Roboskiyê Edalet di hefteya 165an de li Cadeya Sakarya ya navçeya Çankaya ya Enqereyê bi daxuyaniyekê ji bo komkujiya Roboskiyê daxwaza edaletê kir. Di daxuyaniyê de pankarta li ser “Bila kujêr bên dîtin û Roboskî careke din pêk neyê” hate vekirin. Tevî endam û nûnerên însiyatîfêi, partî û saziyên giredayî Platforma Saziyên Demokratîk a Enqere jî tev li daxuyaniyê bûn. Girsê di daxuyaniyê de dirûşmên “Ji bo Roboskî û her kesê edalet” û “Roboskiyê ji bîr neke û nede ji bîr kirin” berz kirin. Avakarê însiyatîfê û rêveberê Komeleya Mafê Mirovan (ÎHD) a Şaxa Enqere Tanju Guduzalp daxuyanî xwend.
‘Hevrûbûn şerteke bingehîn e’
Tanju Gunduzalp bi bîrxist ku di sala 2011an de li Roboskiyê 19 jê zarok, 34 welatiyên sivîl bi balafîrên şer ên dewletê ve hatin qetilkirin û tevî 14 sal ji ser komkujiyê derbas bûn, kujer nehatin darizandin. Tanju Gunduzalp destnîşan kir ku Roboskî nîşaneya sûcên dewletê yên bêceza hatine hiştin e û wiha dirêjî da axaftina xwe: “ Aştî bi naskirina mafên maxduran, aşkerakirina rastiyan û bi hevrûmayinê hewce dike. Komareke demokratîk divê wekheviya welatiyan, azadiya xwe îfadekirinê, hebûna nasname û baweriyên cuda mîsoger dike. Sedema têkçûna hemû pêvajoyên aştiyê yên li cîhanê ew e ku sîstem bi sûcên xwe re hevrû nebûye, bêcezahiştin bi dawî nebûye. Ji bo Roboskî, Sûrûc, Qada Garê ya Enqereyê û hemû qetlîaman, divê bi “Qanûna Rastî û Edaletê” were amadekirin da ku rastiyê eşkere bike û kujeran bidarizîne. Hevrûbûn şertekî bingehîn e.
Daxwazên platformê wiha ne:
“Di berdewama axaftina xwe de Tanju Gunduzalp anî ziman ku divê ji bo di dorza Roboskiyê de edalet pêk were divê têkoşîn bidomê û ji bo sûcên li dijî mirovahiyê pêk neyên ev daxwazên xwe rêz kirin:
Di sûcên li dijî mirovahiyê de divê demborî were rakirin, rastî divê werin eşkerekirin.
Aqubeta windayan divê bê eşkerakirin.
Pêvajoya aştiyê divê li ser bingeha rastî û hevrûbûnê were meşandin.
Saziyên demokratîk divê bên xurtkirin, serweriya hiqûqê û mafên mirovan divê werin misogerkirin.
Mekanîzmayên sererastkirina civakî divê bên xebitandin, girtiyên nexweş divê bên berdan.
Bi lêborîna fermî û siyaseta bîra civakî ve divê dewlet bi sûcên xwe re hevrû bibe. Ji bo aştiyê edalet, ji bo edaletê rastî û hevrûbûn, ji bo hevrûbûnê jî wêrekî lazim e.”
Daxuyanî bi berzkirina dirûşmeyan bi dawî bû.
