Amed- MED TUHAD-FED bi dirûşma “Em ê bi jina azad civaka demokratîk ava bikin” li pêşiya postaxaneyê kom bûn û ji jinên girtî re nameyên Rêberê Gelê Kurd Abdullah Ocalan ji bo jinan nivîsandibû, şandin.
Federasyona Komelayên Hiquq û Piştevaniyê ya bi Malbatên Girtî û Hukumxwaran re a Medê (MED TUHAD-FED bi diruşma “Em ê bi Jina Azad Civaka Demokratîk Ava Bikin” li Postaxaneya Mezin a li navçeya Sûra Amedê, ji jinên girtî re name şand. Gelek jinên nûnerên saziyên sîvîl, partiyên siyasî û parlamentera Mêrdînê a Partiya Wekhevî û Demokrasiya Gelan (DEM Partî) Berîtan Guneş Altin tev li bernameya şandina nameyan bûn. Jin li pêşiya Postaxaneyê Mezin a li Qada Şêx Seîd hatin cem hev û berî qert werin şandin daxuyanî hat dayîn. Di daxuyaniyê de Pankarta “Em ê bi Jina Azad Civaka Demokratîk Ava Bikin” hat vekirin. Berî ku name werin şandin jinan diruşmeyên “Bijî Berxwedana Zîndanan” û “Girtiyên Siyasî Rûmeta Me Ye” berz kirin.
Hevseroka MED TUHAD-FEDê Pinar Sakik Tekîn di daxuyanî de axivî. Pinar Sakik Tekîn da zanîn ku jin pêşengtiya tekoşînê dikin û got: “Em dibêjin heya jin azad nebe, civak azad nabe. Me gelek caran anî ziman ku pêşengtiya têkoşînê jin dikin. Yê ku vê rewşê baş dizane jî Rêberê Gelê Kurd Abdullah Ocalan e.”
‘Girtiyê azadiyê hertim zilm û zordariyê dibînin’
Parlamentera Partiya Wekhevî û Demokrasiya Gelan (DEM Partî) a Mêrdînê Berîtan Guneş Altin jî di axaftina xwe de bal kişand ser berxwedana jinên girtî û ev tişt gotin: “Zindan kirine rastiya gele Kurd lê gele Kurd zindan kirine qada berxwedanê. Her roj têkoşîna aştiyê û azadiyê geştir dibe. Lê em dizanin ku jin her tim rastî zilm û zordariyê tên û vê yekê hîs dikin. Ji ber wê ye ku Rêberê Gelê Kurd Abdullah Ocalan ji bo tevahiya jinan û ji bo girtiyên jin peyamek şand. Em dixwazin vê peyama ku Rêberê Gelê Kurd Abdullah Ocalan şandiye ji jinên di zindanan de tên ragirtin re parve bikin. Em ê berxwedana ku li zindanan didome her roj têxin rojeva Tirkiyê û Kurdîstanê.”
‘Heya Aştî û Civaka Demokratîk pêk were…”
Berîtan Guneş Altin di dawiya axaftina xwe de bal kêşand ser Mafê Hêviyê û ev tişt gotin: “Tu carî armanca me ya ji bo aştiyê bi dawî nabe. Polîtîkayên şer ên ji aştiyê dûr ev sed sal e serê jinên Kurd nedaye tewandin. Jinên Kurd dê bibin sembola azadî û aştiyê. Ji bo pêvajoyê çi ji destê wan bê dê bikin. Mafê Hêviyê yê hatiye dayîn biryareke kêm e. Divê Dewleta Tirk demildest Mafê Hêviyê pêk bîne. Divê ev gav demildest bên avêtin. Heya ku Aştî û Civaka Demokratîk neyê, dê jin paş ve gav navêjin. Di serî de Ayşe Gokan, Leyla Guven em ji tevahî girtiyên jin re silavên xwe dişînin. Em ê berxwedana xwe geştir bikin.”
Pênûs, kulîlk û nameya kirin kartpostal
Jin piştî daxuyaniyê bi dirûşmên “Bijî Berxwedana Zîndanan” ber bi postaxaneyê ve çûn. Wêneyên pênus, kulîlk û nameyên ku Rêberê Gelê Kurd Abdullah Ocalan ji Girava Îmraliyê ji bo jinan şandine, wek kartpostal hatin amadekirin. Jinan têkildarî temenê Rêberê Gelê Kurd Abdullah Ocalan jî 76 kartpostal ji jinên girtî re şandin.
