Meclisa Leşkerî ya HSDê bi beşdariya Fermandarê Giştî yê HSDê Mazlûm Ebdî û endamên Fermandariya Giştî civîna xwe ya asayî li dar xist.
Meclisa Leşkerî ya Hêzên Sûriyeya Demokratîk (HSD) bi beşdariya fermandarên meclisên leşkerî yên herêman, saziyên leşkerî yê HSDê, fermandarê giştî yê HSDê Mezlûm Ebdî û endamên Fermandariya Giştî, civîna xwe ya asayî li dar xist.
Fermandarê giştî yê HSD`ê Mezlûm Ebdî geşedanên siyasî û leşkerî yên li ser asta Sûriyeyê û bakur û rojhilatê wê nirxandin. Ebdî diyar kir ku dan û standin li gorî Peymana 10ê Adarê bi hikumeta veguhêz a Sûriyeyê re berdewam dikin. Her wiha girîngiya parastina agirbesta daîmî û pêşgirtina li provokasyonên ku hewl didin herêmê bikişînin nava şer, destnîşan kir.
Di civînê de dosyayên navxweyî û rêxistinî, tevî entegrasyona nava artêşa Sûriyeyê jî hat vegotin. Hate diyarkirin ku HSD amade ye diyalogan bi Şamê re bike û tavilê hemahengiyê bi komîteyên têkildar re bikin. Her wiha îşaret bi vê yekê hat kirin ku HSD hêzeke nîştimanî ye ku şervanên wê ji pêkhate û herêmên cuda yên Bakur û Rojhilatê Sûriyeyê ne.
Di civînê de têkoşîna li dijî çeteyên DAÎŞê de jî hat nirxandin. Hat destnîşankirin ku li gelek deverên Bakur û Rojhilatê Sûriyeyê êrişên çeteyên DAÎŞê zêde bûne. Hate gotin dê têkoşîna li dijî DAÎŞê bidome, tevkariya bi hêzên Koalîsoyna Navneteweyî re bihêztir bikin da ku çete temamî werin qedandin. Her wiha hate diyarkirin ku dê parastina navenda ragirtina çeteyên DAÎŞê jî xurtir bikin.
Di civînê de biryara efûya giştî ji bo kesên ku neçûne nuqteyên leşkerî û erka xweparastinê pêk neaniye, hate dayîn û ji bo çareserkirina rewşa wan jî derfet hatiye dayîn.
Her wiha dosyayên girêdayî pêşxitina asta şervanan û perwerdekirina wan jî rojevên civînê bûn.
Di dawiya civînê de Meclisa Leşkerî ya HSDê diyar kir ku ew di çareseriya siyasî de bi israr e û wekî ku vebijêrka sabît a ji bo mîsogerkirina ewlehiya Sûriyeyê û parastina gel nirxand. Her wiha girîngiya parastina ewlehî û aştiya navxweyî ya Bakur û Rojhilatê Sûriyeyê û mîsogerkirina mafên tevahiya pêkhateyan vegot. Meclisê destnîşan kir ku ji bo ewlehî û piştevaniya aştiya giştî li Sûriyeyê dê bi hemahengiya şirîkên navneteweyî têkoşîna li dijî çeteyên DAÎŞê bidomîne.
