Platforma Jinan a Wanê, bi boneya 3yemîn salvegera kuştina jina Kurd Jîna Emînî daxuyanî da û da zanîn ku bîranîna Jîna Emînî berpirsiyariya têkoşînek xurttir, rêxistinkirîtir û bibiryartir li ser wan bar dike.
Platforma Jinan a Wanê, bi boneya 3yemîn salvegera kuştina jina Kurd Jîna Emînî ku li Îranê ji aliyê polîsên exlaqê ve hatibû kuştin, li Kolana Hunerê ya Wanê daxuyanî da. Di daxuyaniyê de pankarta “Jîna Emînî serhildana me ye, jin jiyan azadi” hat vekirin û dirûşma “jin jiyan azadî” hat berzkirin. Endamên saziyên sivîl, partiyên siyasî û gelek kes tev li daxuyaniyê bûn.
Li ser navê platformê aktîvîsta TJAyê Ayşe Mînaz metna daxuyaniyê xwend û diyar kir ku Jîna Emînî di bîranînên jinan de weke birîn û serhildanekê cihê xwe girtiye. Ayşe Mînaz da zanîn ku kuştina Jîna Emînî ne tenê îfadeya herî zelal a zordariya li ser beden û jiyana jinan e, lê di heman demê de ya pergala serdest a mêran e ku îradeya jinan paşguh dike. Ayşe Mînaz wiha got: “Mirina wê ne tenê rastiya hevpar a jinên li Îranê, lê di heman demê de ya jinên li seranserê Rojhilata Navîn dijîn jî aşkere dike. Weke Platforma Jinan a Wanê, em dizanin ku têkoşîna jinan nayê bêdengkirin, ne li Îranê, ne li Tirkiyeyê, ne jî li tu deverek din a cîhanê. Mafê jiyan, azadî û wekheviya jinan nayê nîqaşkirin. Bîranîna Jîna û Rojîn berpirsiyariya têkoşînek xurttir, rêxistinkirîtir û bi biryartir li ser me bar dike.”
