Medya Haber di salvegera darbeya leşkerî ya 12ê Îlonê de dê (îşev) belgefîlma ‘Şeva Çaran’ biweşîne.
Belgefîlma “Vejîna Kurd: Ji qirkirinê ber bi jiyana azad ve” ku ji 90 beşan pêk tê û derbarê berxwedan û têkoşîna tevgera azadiyê ya gelê Kurd e, wek Kurdî li ser ekranên Stêrk TV êvarên rojên çarşemê, li ser Medya Haber TVyê wek Tirkî êvarên rojên înê tên weşandin.
Vejîna Kurd ku di encama berhema keda 9 salan a xebatê de derketiye holê, bi sedan şahidan, bi hezaran belge, wêne û dîmenên vejîna bi rûmet û berxwedana gelekî di bin gefa qirkirinê de nîşan dide.
Hefteya bihurî, beşa 22yemîn a belgefîlmê ya bi navê “Berxwedan Jiyan e” berxwedana zindana Amedê ya li dijî zilma faşîzma 12ê Îlonê ji Mazlûm Dogan heta Kemal Pîr û Xeyrî Durmuş, anî bû ser ekranê. Di vê beşê de ji bilî çîrokên qehremaniya takekesî, sembola têkoşîna gelê Kurd a ji bo azadiyê û kodên dîrokî yên berxwedana kolektîf a li dijî faşîzmê li Tirkiyeyê nîşan dide.
Li Zindana Amedê çalakiya dîrokî
Beşa 23yemîn, “Şeva Çaran”, rastî salvegera darbeya 12ê Îlona 1980an hat. Ev beş berxwedana dîrokî ya Ferhat Kurtay, Necmî Oner, Mahmut Zengîn û Eşref Anyik ku bedena xwe li Zindana Amedê Hejmar 5 şewitandin û di bîra gelê Kurd de cihek nayê jibîrkirin hişt, nîşan dide.
Faşîzma 12ê Îlonê zilm û asîmîlasyoneke giran li ser gelê Kurd ferz kir; cihê wê yê herî sembolîk Zindana Amedê ya Hejmar 5 bû. Zindana Amedê ya Hejmar 5 ne zindanek ji rêzê bû, ew wekî laboratuwarek ji bo neçarkirina gelê Kurd bo teslîmbûnê, kar kir; berxwedana ku li dijî wê derket holê bû yek ji beşên bi rûmet ên têkoşîna azadiya Kurd.
Beşdarên vê hefteyê
Di beşa “Şeva Çaran” de yek ji sembola têkoşîna azadiya jinên Kurd Sakîne Cansiz û berxwedêrên demê Mûstafa Karasu, Fuat Kav, Muzaffer Ayata, Kemal Aktaş û Bedrettîn Kavak cih digirin. Beşîr Dundar ê di heman hucreyê de bû û şahidiya çalakiyê kiribû, behsa kêliyên çalakiyê dike. Xwişka Ferhat Kurtay Rabîa Kurtay jî şahidiya xwe û bîranînên malbatê vedibêje. Di belgefîlmê de dayika Cemal Arat ku yek ji endamên Dayikên Aştiyê ye Sakîne Arat jî cih digire. Şahidiyên xwişka endamê MK ya PKK’ê Riza Altun Xezal Altun, xwişka Mûstafa Karasu Zarîfe Karasu û her wiha Nedret Tanrikulu girîngiya berxwedana li derve û têkoşîna dayikan radixe ber çavan.
Bernameya weşanê
“Şeva Çaran” dê îşev saet 7:00ê êvarê bi dema Ewropayê û 8:00ê êvarê bi dema Kurdistan û Tirkiyeyê li ser Medya Haber TVyê bê weşandin.
Arşîva belgefîlman
Beşên berê yên belgefîlmê li ser înternetê û li ser Telegramê tên parvekirin. Kesên dixwazin beşên din jî temaşe bikin, dikarin xwe li ser lînkên li jêr bigihînin van beşan.
https://t.me/taradokumanter
https://kominatara1.com
