Kongreya Îslama Demokratîk (KÎD) xwest ku pergaleke nenavendî ji bo Sûriyeyê bê pejirandin.
Di çarçoveya civîn û panelên ku bi armanca şîrovekirina nêrîna xwe li ser siberoja Sûriyeyê li dar dixe de, Meclisa Jinan a Kongra Îslama Demokratîk panela bi sernavê “Nêrîna siyasî û olî ya Kongreya Îslama Demokratîk der barê siberoja Sûriyeyê de” li Parka Xwendinê ya bajarê Hesekê yê kantona Cizîrê li dar xist. Ji bajarên Hesekê, Şedadê, Dirbêsiyê, Hol, Til Temir û koçberên ji Serêkaniyê bi dehan nûnerên Meclisa Ol û Baweriyan a Bakur û Rojhilatê Sûriyeyê beşdarî panelê bûn.
Di panelê de 3 mijarên sereke hatin şîrovekirin. Mijara yekemîn bi sernavê “Nêrîna olî û siyasî ya Kongreya Îslama Demokratîk ji bo avakirina Sûriyeya nû” ji aliyê endama Koordînasyona Jinan a Kongreya Îslama Demokratîk Xilûd Ebdo ve hat şîrovekirin.
Xilûd diyar kir ku divê piştgiriya hewldanên lihevhatina di navbera Sûriyeyan de were kirin, çanda diyalogan di navbera mezheb û olan de were xurtkirin, rola jin û ciwanan pêşxistin û çavdêrî li xîtaba olî were kirin û ji nîjadperastî û mezhebperestiyê were rizgarkirin. Xilûd anî ziman ku divî li Sûriyeyê pergaleke nenavendî were pêkanîn ku mafên hemû pêkhateyên civaka Sûriyeyê û mafên olî mîsoger bike.
Endama Meclisa Jinan a bajarê Hesekê ya Kongreya Îslama Demokratîk Ezîza Hiso jî mijdara duyemîn a bi sernavê “Banga ji bo zanînê” şîrove kir. Ezîza anî ziman ku Îslam banga aştiyê dike, demokasî jî banga heman tiştî dike, lew ra di vî mijarê de nakokî di navbera herduyan de tune ye.
Mijara sêyemîn a panelê “Hevgirtina Al El Beyet” ji aliyê rêvebera Nivîsgeha Jinan a Hevgirtina Al El Beyet Xilûd Şêx Îsa ve hat birêvebirin. Xilûd qala hêmanên sereke yên ola îslamê û rola Al El Byet di dîroka îslamê de kir. Her wiha Al El Beyt wekî “hêmanên olî, civakî û çandî yên xwedî wateyên kûr di dîroka misilmanan de” pênase kir.
Piştre beşdaran jî li ser mijarên panelê nêrînên xwe anîn ziman. Hate gotin, peyama Medîna El Munewara ji bo avakirina Sûriyeya siberojê ya li ser bingehên demokasî, hevgirtina hemû pêkhate û mezheban û mîsogerkirina mafan çareseriya herî guncaw e.
Kobanê
Kongreya Îslama Demokratîk şaxê kantona Firatê bi heman mijarê panelek li Navenda Çand û Hunerê ya Baqî Xido ya li bajarê Kobanê li dar xist. Bi dehan endamên saziyên sivîl û partiyên siyasî beşdarî panelê bûn.
Piştî rêzgirtinê, hevserokê Kongreya Îslama Demokratîk a Herêma Bakur û Rojhilatê Sûriyeyê Îbrahîm Elî El Mihemed rewşa siyasî nirxandin û got: “Bûyer û geşedanên ku li Sûriyeyê rû didin, jîngehek ava kir ku bi navê îslamê mirov tên qetilkirin, îtîraf bi mezheb û neteweyên din nayê kirin. Ji ber vê yekê çareserî di îslama demokratîk de ye.”
Endamê Kongreya Îslama Demokratîk a Bakur û Rojhilatê Sûriyeyê Ebdulkerîm Saroxan jî anî ziman ku rêgezên îslama demokratîk hemû tiştên qenc û erênî qebûl dike û wiha got: “Rêya çareseriyê di îslama demokratîk de ye. Di dîrokê de em bûn şahid ku bi navê îslamê kuştin û belavkirina tevliheviyan hatin kirin. Îro jî heman tişt dûbare dibin. Lew ra divê em îslama demokratîk a rasteqîn bipejirînin.”
Panel bi nîqaşan li ser rewşa îslamê bi dawî bû.
